8 қарашадан бері жүргізушілер полиция және жергілікті әкімдік өкілдерімен кездесіп, арыз-шағымдарын айтып жатыр.
Көлік иелері не талап етті
- Ресейде тіркелген машинаны заңдастыруды.
- Көлігін елде есепке қойғысы келетіндер үшін утилизациялық алым мен бастапқы тіркеу сомасын азайту не мүлде алып тастауды.
- Тіркелмеген машинаны айыптұраққа жібермеуді.
Қырғызстан мен Армениядан жеткізілген көлік мінгендер сияқты, бұлар да жетіскеннен Ресейден машина алмағанын, шетелдік темір тұлпар Қазақстандағыдан әлдеқайда арзан екенін, Қазақстанда тіркейін десе, қаражат жетпейтінін, ал кейбір көліктерді тіпті есепке қою мүмкін еместігін айтып шағымданды.
Ресейлік нөмір таққан көлік иелері қандай жауап алды
Тәртіп сақшылары Ресейде есептен алынған машинамен жүру заңсыз екенін атап өтті. Бірақ түсіністік танытып, әзірше жол ережесін бұзбаған жүргізушілердің темір тұлпарын айыптұраққа қоймауға сөз берді. Ал заңдастыруға қатысты талапты ішкі істер министрлігі қарайды.
Кеше кешке ҚР ІІМ әр аймақтағы ресейлік көлік иелеріне арналған call-орталық іске қосылғанын хабарлады.
Мұндағы кей нөмірге қоңырау шалу мүмкін болмады, біразы бос емес. Оның үстіне қоңырауға білікті маман жауап беретініне күмән бар, өйткені бірнеше өңірдегі полицейлер Еуро-5-тен төмен класты машина тіркелмейтінін айтыпты. Ал бұл қате ақпарат!
ҚР ИИДМ-нің «Қазақстан Республикасының автомобиль жолдарымен жүруге арналған автокөлік құралдарының жол берілетін параметрлерін бекіту туралы» № 342-бұйрығы бойынша біздің елде Еуро-4 және одан жоғары класты жеңіл автомобильді бастапқы тіркеуге болады. Ол үшін техника:
- бұғаттауға қарсы тежеуіш жүйесімен (ABS);
- алдыңғы қауіпсіздік жастығымен;
- балалар орындығын бекітуге арналған ISOFIX жүйесімен;
- күндізгі жүріс шамдарымен жабдықталуға тиіс.
Ресейде өндірілген көліктер 2010 жылдан бері Еуро-4 нормаларына сай. Біз осы мәселе бойынша ҚР ІІМ-ге хабарлаған соң, мекеме кол-орталық операторларын мұқият дайындауға уәде берді.
Комментариев: 0