Қазақстан көлікті қайта тіркегенде агрегат нөмірін тексеруден 2018 жылы бас тартқан. ІІМ сол кезде күн сайын тіркелетін мыңдаған көлік арасынан ауыстырылған нөмірлер өте сирек анықталатынын және сол шара үшін тым көп тексерушіні ұстаудың қажеті жоқтығын айтқан еді. Бірақ екі жылдан соң мәжіліс депутаттары бұл мәселені қайта қозғады.
Премьер-министрдің орынбасары Роман Склярдың атына депутаттық сауал жолдаған Ерсұлтан Бектұрғанов мотор нөмірінің тексерілмеуі ұрланған машиналарды табуды қиындататынын айтты. Шендінің сөзінше, 2018 жылдың басынан Қазақстанда 5 132 автокөлік ұрланған, оның 1 922-сі ғана табылып, иесіне қайтарылды. Жыл сайын табылатын машиналар азайып бара жатыр. Агрегат нөмірін тексеруден бас тарту қылмыскерлерге жақсы көмек беріп жатқан сияқты.
Депутат тексерісті қайта бастап, қозғалтқыштағы мәліметті техникалық төлқұжатқа жазуды ұсынды.
«Қазіргі уақытта қозғалтқыш қосалқы бөлшек саналады, ол істен шыққан жағдайда оп-оңай ауыстырып, ресми түрде қайта тіркеуге болады. Бұл көлік иелері үшін ыңғайлы. Алайда қозғалтқыш нөмірінің тексерілмеуі оның көлемін құжатқа кемітіп жазуға мүмкіндік беруі мүмкін. Осылайша бұл алаяқтық әрекеттердің жасалуына жол ашады деп ойлаймыз», — деп мәлімдеді Е. Бектұрғанов.
Комментариев: 0