Defender-ге бәсекелес болатын Geely моделі сынақтан өтіп жатыр

Geely 2025 жылы көктемде Шанхай автосалонында таныстырған Galaxy Cruiser концептісінің сериялық нұсқасын биыл нарыққа шығаруды жоспарлап отыр. Автомобиль қазір сынақтан өтіп жатыр. Компания суық климатта (Швецияда, Арьеплуг маңында) тексерістен өтіп жатқан жаңа өнімнің бірнеше суретін жариялады.

Камуфляж астында тұрса да фотодан автомобиль концептінің профилін сақтап қалғаны байқалады. Бірақ алдыңғы бөлігінің дизайны өзгеріп, дәстүрлі радиатор торымен, басқа шаммен жабдықталған. Лидар мен шноркель көзге түседі, соңғысы зауыттық опция болуы мүмкін.

Машинаның күштік құрылымы жайлы ақпарат жоқ. Бірақ жергілікті БАҚ Galaxy Cruiser толық жетекті Galaxy M9-дың гибрид жүйесімен жүруі мүмкін деп жазды. Ол — 1.5 литрлік дәстүрлі қозғалтқыш пен үш электромотор (жалпы 848 ат күшіне ие) және 41.5 кВт·сағ батареядан тұратын күштік құрылым. Бұған дейін модель Zeekr 9X моторын алады деген ақпарат тараған.

Жаңа өнімнің басты ерекшелігі — жүзу режимі. Бұл режимде жол талғамайтын көлік кішігірім судан 8.5 км/сағ жылдамдықпен жүзіп өте алады.

Автомобильдің тұсаукесері биыл сәуірде Бейжің автосалонында өтеді. Машина Қытай нарығымен шектелмей, экспортқа шығады. Ол Land Rover Defender және Mercedes-Benz G-Class-қа бәсекелес болады. Geely басшылары Galaxy Cruiser-ге осындай үміт артып отыр.