Geely концерні Defender мен G-Class-тың бәсекелесін көрсетті

Компания былтыр көктемде Galaxy Battleship (Galaxy Cruiser) деп аталатын гибрид концептісін Шанхайда көрсетті. Қазір Geely инженерлері прототиптің сериялық түрленімін әзірлеп жатыр. Концерннің дизайн-орталығының басшысы Флавиан Даше Autocar басылымына берген сұхбатында жаңа өнім тек Қытайда емес, Еуропада да саудаға шығады деді.

Қарт құрлықта машина Defender мен G-Class клиенттерін өзіне тартуы керек. Өйткені дәл осы модельдер оның басты қарсыластары.

Galaxy Cruiser-дің сериялық нұсқасы SEA-R платформасына негізделген. Бренд оны Zeekr 9X-ке қолданды. Жаңа көлік соған ұқсас гибрид күштік құрылым алуы мүмкін. Ол 2 литрлік турбомотор, бірнеше электрлі қозғалтқыш және 70 киловаттық батареядан тұрады. Максимал қуаты 1400 ат күшіне тең, бірақ Geely-дің моделі 9X-тің кіші модификациясы сияқты 897 ат күшін беретін агрегатпен жүруі ықтимал.

Автомобиль тәуелсіз белсенді аспа, толық жетек жүйесін басқаратын жақсарған алгоритм, жүргізуші ассистенттерінің кешенімен жабдықталады және 80 см таяз судан өте алады.

Автомобиль Еуропа нарығына қашан шығатыны әзірге белгісіз. Қытайда 2026 жылдың аяғына дейін жарық көреді деген ақпарат тарады.