Audi 1000 ат күшіне ие Nuvolari суперкарын көрсетті

Компания былтыр қыркүйекте брендтің жаңа дизайн бағытын көрсететін және TT-дің оралатынын меңзейтін екі есікті Concept C концептісін жұрт назарына ұсынды. Бірақ осы стильде жасалған алғашқы сериялық модель әйгілі R8 суперкарының ізбасары — жаңа Nuvolari болды. Бұл атау 1930 жылдары жарысқан атақты италиялық пилот Тацио Нуволаридің құрметіне берілген.

1 / 8

• 
• 
• 
• 
• 
• 
• 
• 

1 / 8

Футуристік суперкар Audi Space Frame деп аталатын кеңістікті рамаға негізделген. Шанақ панельдерінің басым бөлігі карбоннан жасалған. Бұл — Audi тарихындағы көміртекті пластик элементтері көп алғашқы модель. Машинаның артында F1 болидтеріндегідей DRS функциясы бар белсенді антиқанат тұр. Батырманы басқанда ол тартым күші ең төмен режимге ауысып, түзу жолда барынша жоғары жылдамдыққа жетуге көмектеседі, ал тежегенде немесе бұрылғанда тұрақтылықты арттырады.

Суперкар Lamborghini Temerario-дан алған гибрид күштік құрылыммен жүреді. Италиялық суперкарда бұл жүйе 920 ат күшін берсе, немістердің көлігінде қуаты 1001 ат күшіне жетеді. Екі турбиналы 4 литрлік V8 үш электромотормен жұптаса жұмыс істейді. Екеуі алдыңғы оське, үшіншісі іштен жанатын қозғалтқыш пен 8 сатылы роботтың арасына жайғасты. Гибрид жүйе 7.3 киловаттық ықшам аккумулятордан қуат алады.

Nuvolari алғашқы жүздікті 2.6 секундта, екіншісін 6.8 секундта еңсереді. Жылдамдығы 350 км/сағ-тан асады. Суперкар карбон-керамикалық тежеуішпен жабдықталады.

Интерьері Concept C-дің салоны сияқты минимализм стилінде жасалған, бірақ ықшам жиналмалы мультимедиа дисплейінің орнына үлкенірек тік тачскрин тұр. Компания әзірге модельдің жабдықтары туралы толық ақпарат бермеді.

Клиенттер автомобильді 2027 жылдың бірінші жартысында алады. Жаңа өнімнің небәрі 499 данасы жарық көреді. Бағасы белгісіз, бірақ кем дегенде 600 мың еуро болады.