Қытайдан келген Zeekr 9X біздің елде бұғатталып қалды

Аспан асты елінен Еуропаға аттанған азамат Қазақстан шекарасынан өте сала қиындыққа тап болды. CarNewsChina хабарлағандай, машина навигация, электр жетек, бензобак қақпағының электрондық кілті сияқты бірнеше функцияны автоматты түрде бұғаттап тастаған. Көлігіне жан бітіру үшін Қытай тұрғыны 30 сағат жұмсапты.

Келеңсіз оқиға айдың ортасында болған, жуырда Zeekr-дің өзі осы мәселе жөнінде пікір білдірді. Компания өкілдері өз еліндегі басылымдардың біріне бұғаттау бренд өнімдерін ұрлау не заңсыз шекара асырудан қорғау тәсілдерінің бірі деді.

9X иесінің сөзіне сенсек, саяхатқа шықпай тұрып ол марканың сервистік орталығына барып, шетелге аттанайын деп жатқанын айтқан, алайда ешбір маман көлік бұғатталып қалады деп ескертпепті. Ал Zeekr автомобиль шекарадан өткенде экранға тиісті ескерту шығады деп мәлімдеді. Одан бөлек, жүргізуші басқа елдердің аумағына кіргенде электрондық сәйкестендіру шарасынан өтуге тиіс, себебі тек бір өңірде қашықтан бұғаттан шығаруға болады екен.

Компания 9X тізгіндеген клиенттеріне осындай жағдайға тап болса, қуаттау портын қолмен ашуға болатынын түсіндірді. Ол үшін апаттық сигнал батырмасын 5 секунд басып тұру керек.