Артқы редуктордағы жарық: Zeekr 9X-тен кемшілік табылды ма?

2025 жылы көктемде жарық көрген Zeekr 9X Қытайда күз басында саудаға шықты, ал клиенттердің қолына жыл аяғына таман тие бастады. Zeekr-дің алғашқы бензин-электрлі моделі 1400 ат күшіне жететін (үздік нұсқасында) күштік құрылымымен жұрт назарын аударды. Бірақ Қытайдан өзге елдердегі жүргізушілер жаңа автомобильге тән емес проблемаға шағымдана бастады.

Интернетте артқы мотор-редуктордан салқындатқыш сұйықтық аққты деген ақпарат тарады. Мұндай шағымды Қазақстан мен Ресейдегі жаңа гибрид иелері түсірген, мұндай жағдай Қытай мен Өзбекстанда да тіркеліпті.

Сұйықтықтың ағуына деталь корпусындағы жарық себеп болған, бірақ оның қалай бүлінгені белгісіз. 9X иелері магний редукторға реагент әсер етті немесе ол аязға төзбеді деген сияқты түрлі болжам жасады. Дәнекерлеу жұмысымен айналысатын ресейлік мамандар проблеманың түп-төркіні құрылымдық қателікте жатыр деп санайды.

Мәселе мынада: мотор-редуктор кергішке небәрі төрт жерден бекітілген, жылдамдық күрт артқан кезде оларға ауыр жүктеме түседі. Сөйтіп, осы әлсіз жерінде жарық пайда болады. Ресейдегі тәжірибелі дәнекерлеушілер зақымданған корпусты қалпына келтіру қызметін ұсына бастады, бірақ бұл проблеманы біржола шеше ала ма, жоқ па, белгісіз. Motor басылымы Ресейде «сұр импорт» арқылы Zeekr жеткізетін сатушылар жаңа автомобильдердің мотор-редукторын жаңартуды ойластырып жатыр деп жазды.

9X гибриді біздің елде де ресми сатылмайды — Алматы мен Астанада жүрген бірнеше экземплярды жеке тұлғалар әкелген.