Алматыға кіру ақысы қанша болады

Алматы әкімдігі биыл тамызда экологиялық талапты күшейту туралы жоба құжатын қоғам талқысына салды. Билік оны қабылдаса мегаполис шығарынды деңгейі төмен аймаққа айналады. Экологиялық класы Еуро-5-тен төмен немесе электрлі қозғалтқышы жоқ көлік иелері қалаға кіру үшін ақы төлейді. Бұл талап жаңа дизельді машина мінетіндерге де қатысты.

Алматыда шамамен 300 мың техника «қара тізімге» енуі мүмкін. Бұл — қаладағы жеңіл көлік паркінің жартысына жуығы. Өңірлерден мегаполиске кіретін ескі автомобильдердің нақты санын есептеу қиын, бірақ мыңнан асатыны анық.

Оңтүстік астанаға шамамен жарты миллион машина ақылы кіруі мүмкін. Almaty Air Initiative қорының атқарушы директоры Жұлдыз Сәулебекованың айтуынша мұндай көліктің қала ішінде жүруіне мүлде тыйым салынуы ықтимал. Ол Еуро-0 және Еуро-1 кластағы машина мүлде жолға шықпауы мүмкін дейді, себебі олар ауаны ластайды. Еуро-2 және Еуро-3 класына кіретін автомобильге қатысты шектеу әзірге талқыланып жатыр.

Bes.media басылымы хабарлағандай, Ж. Сәулебекова экоережені әзірлеу барысында алдымен жүк көлігі мен коммерциялық техникадан бастап кезең-кезеңімен шектеу не абонемент жүйесін енгізу сияқты түрлі сценарий талқыланғанын атап өтті. Шенділер бұл ұсынысты мақұлдаса, ескі автомобильден тәулігіне 0.4 АЕК (2026 жылы 1730 теңге) сұралғанмен, ай сайынғы абонемент құны біршама арзан болуға тиіс еді. Бірақ қордың атқарушы директоры оның бағасын нақты айтпады.

Әкімдік өкілдері Kolesa.kz редакциясына жобаны Әділет министрлігі қарап жатқанын айтты. Ол қашан қабылданады, тіпті қабылдана ма, әлде түзеу үшін экологтарға қайтара ма, белгісіз. Құзырлы орган жобаны бекіткен соң ғана экотөлем туралы сөз қозғауға болады.

Дегенмен бұл әрекеттің заңдылығына күмән бар. Әділет министрлігі әкімдіктің Экокодексті өз бетінше түсініп, мәслихаттың ереже шығаруы, шаһарға кіргендерден төлем талап етуі, класы Еуро-5-тен төмен техниканы қара тізімге енгізуі қаншалықты заңды, соны анықтауға тиіс.