Еуропада дәстүрлі мотормен жүретін машиналар қымбаттайды

Франция экологияға зиян келтіретін машиналардан бас тартудың келесі кезеңіне көшті. 2024 жылдан бастап жаңа машина сатып алғанда міндетті төлем түрін қайта қарайды. Forbes ақпаратына сәйкес төлем WLTP сынақ циклы бойынша зиян қалдық шығару деңгейіне байланысты есептеледі.

Жаңарған есептеу тәсілі бойынша қозғалтқыш көлік 1 шақырым жолда 117 граммға дейін CO2 бөлсе, иесі ешқандай шығынға ұшырамайды, одан әрі 50 және 60 000 еуро арасында ақша төлейді.

Мысалы, биыл Францияда танымал 1.3 литрлік турбомоторы бар Dacia Duster алу үшін қосымша 1074 еуро төлеу керек, себебі WTLP бойынша ол ауаға 141 гр/км зиян зат бөледі. Mercedes-Benz GLE 300 d-де бұл көрсеткіш — 181 гр/км, демек көлік иесі қосымша 20 569 еуро артық шығындалады.

Ең көп үстеме WTLP шкаласы бойынша 193 гр/км-ден асатын қуатты машиналарға тиесілі болады. Бұл тізімде BMW M3 бар. Седанға бірден 60 000 еуро қосылады. Дәл осындай жағдай BMW X7 (206 гр/км), Mercedes-Benz G 500 (384 гр/км), Mercedes-AMG GLE 63 S 4MATIC+ (284 гр/км), дизельді Audi Q7 (212 гр/км) модельдерін де күтіп тұр. Бұл талап дизельмен жүретін ескі Toyota Hilux (218 гр/км) немесе 2.8 литрлік мотормен жабдықталған Land Cruiser Prado 150-ді де (250 гр/км) айналып өтпейді.

Forbes басылымы қазірдің өзінде Францияда электромобиль саудасы шарықтап тұр деп жазды. Биыл алғашқы жартыжылдықта француздар 137 919 электрокар сатып алған, бұл былтырмен салыстырғанда 47.8 % артық. Алты айда жергілікті тұрғындар жалпы 889 776 автомобиль алды.