Алматы билігі көліктің экокласын қашан қадағалай бастайды

Алматының ауасын сақтау жобасын шенділер биыл 5 тамызда қоғам талқысына салған. Біраз уақыттан соң құжаттағы кей норманы түсіндіру барысында оңтүстік астананы шарттары әртүрлі бөліктерге не аудандарға бөлмейміз деді. Қаланың бүкіл аумағы зиян газ аз тарауға тиіс аймаққа айналады екен. Сондықтан экокласы Еуро-5-тен төмен көлік мінгендер тегін жүре алмайды.

Жоба қашан іске қосылады

Бүгін әкімдік көлік легін арнайы сезгектер мен пилотсыз ұшатын аппараттар бақылайды деп түсіндірді. Кезең-кезеңімен жүзеге асатын процесс алдымен орталықтан басталады. Бастапқыда, яғни қазан айында жоба көлік қозғалысын талдау және автопарктің құрамын анықтау үшін тест түрінде жұмыс істейді. Болашақта Еуро-0—4 класты бензинді машиналар мен дизельді техника Алматыға тек ақша төлеп кіреді, ал электромобиль мен сутекті қозғалтқышы бар және Еуро-5, Еуро-6 класты көлік иелері тегін жүреді.

Жол ақысын қалай төлеу керек

Мегаполис тұрғындарына (әкімдік өкілдері Алматы мен оның маңында тұратын, қалада жұмыс істейтін азаматтар деді. — Kolesa.kz ескерт.) жеңілдік жасалады. «Таза қала» жүйесіне тіркелсе әрі техникалық тексеріс нәтижесі жақсы болса, бағасы төмен абонемент беріледі. Абонемент алмағандар шаһарда жүрген әр күні үшін қаражат жұмсайды. Сағатпен есептелетін тариф жоқ.

Қанша төлеу қажет

Тәулігіне қанша сұралатыны әзірше белгісіз. Бірақ шенділер одан түскен ақша экологиямен байланысты бастамаларды іске асыруға, қоғамдық көлік саласын дамыту, тұрғындарды қолдау шараларына жұмсалады деді.

«Сондай механизмдердің бірі халықтан экокласы төмен ескі көліктерді сатып алу бағдарламасы болады, ол шектеу енгізу шарасының салдарын жеңілдетуге және автопарктің жаңаруын жеделдетуге мүмкіндік береді», — деп мәлімдеді әкімдік өкілдері.

Есептеп көрейік

Еуро-5 класты машиналар еуропада 2008 жылдан, Ресейде 2016 жылдан, ал Қытайда 2013-2014 жылдан бері жасалып жатыр. Ұлттық статистика бюросында 18-19 жастағы автомобильдер туралы нақты дерек жоқ. Онда 10 жыл бұрын не 20 жыл бұрын жарық көрген қанша машина бары ғана жазылған. 1 тамыздағы мәлімет бойынша тым ескі саналатын 207 мың көлік жүр. Билік олардан ақы алатыны анық.

Егер көлік иесінен тәулігіне 100 теңге сұралады десек (қазір бір сағаттық тұрақ ақысы сондай) жиырма жыл бұрын шыққан көлік иелері қала қазынасын күнде 20 миллионға толтырады. Бір ай ішінде ескі машина мінгендер жалпы 621 млрд теңге береді. Бір жылдағы соманы білу үшін осыны 12 айға көбейтіңіз.

Бұл тек жиырма жыл бұрын шыққан автомобильдерге қатысты екенін еске саламыз. Біз Алматыға басқа аймақтардан келетіндерді есепке алмадық. Күніне шеттен ондаған мың автомобиль кіреді, көбінің класы Еуро-5-ке жетпейді.