Алматыдағы бірнеше көшеде көлік тек бір бағытта қозғалады

Өңірлік коммуникациялар қызметі өткізген баспасөз конференциясында сөз алған Алматы қаласы жол инфрақұрылымын дамыту басқармасының басшысы Ержан Диханбаев биліктің жоспарын жария етті. Шенді көлік желісін жаңарту барысында Әл-Фараби, Тілендиев, Шевченко, Құрманғазы, Сәтбаев, Өтеген батыр, Рысқұлов, Шығыс айналма жол мен Солтүстік айналма жолға автобус жолағын салу мүмкіндігін қарастырып жатырмыз деді.

Әкімдік «Тастақ» базарының маңындағы Брусиловский, Түркебаев, Қарасай батыр, Құлымбетов көшелері мен Әуезов, Байзақов, Жуков, Уәлиханов және Радостовецтің кей бөлігінде тек біржақты қозғалысқа рұқсат беруді көздеп отыр. Мамандар Тимирязев, Жандосов, Манас, Мыңбаев, Береговой, Армянская, Айманов, Пушкинде де дәл осы схеманы қолдануға ниетті. Бірақ ол қашан, қалай жүзеге асатыны, Тимирязевтегі BRT мәселесі қалай шешілетіні белгісіз.

Басқарма басшысы биыл билік шаһардағы жолдарға 2500-ден аса белгі орнатып, 350 мың шаршы метрге жуық таңба сызатынын ғана айтты, бұған шамамен 4 млрд теңге кетеді екен. Тағы 40 километр веложолақ пайда болады. Жауапты мекеме Сәтбаев, Масаншы, Жароков, Жандосов, Жамбыл, Қарасай батыр, Қазыбек би, Назарбаев және Абылайхан бойына веложолақ сызады. Жыл аяқталғанша 8 ақылы тұрақ салу да жоспарда бар.

«Заманға сай табысты қала — ең алдымен көлікке емес, адамға ыңғайлы мекен. Сондықтан әлемдегі мегаполистер қоғамдық көлік желісін дамытып, велоинфрақұрылым жасауға, қауіпсіздікті арттыруға ерекше мән береді. Бір ғана автобус жолағымен автомобиль жүретін бөліктен әлдеқайда көп адам қатынайды. Қазір пилоттық шешімдерді арнайы таңба мен уақытша қозғалыс схемасы арқылы тексеріп жатырмыз, сынақ сәтті өтсе, жобаның ауқымы кеңейеді. Бұл көп шығындалмай-ақ, жол жағдайын тиімді әрі тез жақсартуға мүмкіндік береді. Қозғалысты ұйымдастырудың жаңа схемалары көшенің өткізу қабілетін 20–25 % арттырып, апат санын 35 %-ға дейін азайтады және негізгі көлік тораптарына түсетін жүктемені жеңілдетуге оң әсерін тигізеді», — деді Е. Диханбаев.