VIN-коды жоқ мопед жаңа көлік ретінде тіркеледі

Қазақстанда мопед тіркеу биыл 20 қаңтарда басталды. Скутерде мемлекеттік нөмір болуын талап ететін заң 5 сәуірде күшіне енеді, бірақ полиция сынақ ретінде бұл шараны үш ай бұрын бастады.

Мопедті арнайы ХҚКО-лар есепке қояды. Шағын көлемді мототехниканы тіркеу үшін оның иесінде мынадай құжаттар болуы қажет: жеке куәлік немесе оның цифрлық нұсқасы, техникалық құжат (бар болса) немесе мопедтің сипаттамасы туралы мәлімет (ашық дереккөзден алынған мәлімет). Бірақ ешбір құжаты жоқ скутерлер де кездеседі.

«Егер VIN-коды жоқ немесе шыққан жылы белгісіз болса, бұл деректер тексерістен кейін беріледі. Яғни мопедтің техбайқаудан өткен жылы шыққан жылы деп саналады», — деді ҚР ІІМ ресми өкілі Шыңғыс Әлекешев.

Демек құжаты жоқ ескі скутер тіркеуден өткен соң жаңа мототехника саналады.

Жақында міндетті техникалық тексерістен өту ережесіне өзгеріс енеді, оған сәйкес шыққанына бір жыл толмаған мопед техбайқаудан өтпейді. Яғни ең ескі мопедтің өзі 2026 жылғы көктемге дейін жолда жүре береді. Бұл шешімге қалай қарайсыз?

Мопедті есепке қою үшін тіркеу алымы (0.25 АЕК) және көлік құралын тіркеу куәлігі (1.25 АЕК), мемлекеттік тіркеу нөмірі белгісі (1.4 АЕК, 5505 теңге) ақысын төлеу қажет. Алматыда 50 мыңға жуық мопедтің бес жүзден астамы тіркелді.

5 сәуірден бастап мопед механикалық көлік құралы атанып, көшедегі камералардың назарынан тыс қалмайды. Ереже бұзған мопедшілер айыппұл төлейді.