2025 жылы қымбат көлік алғандар декларация тапсырады

15 шілдеде ҚР президенті Салық кодексіне енген өзгеріске қол қойды. Құжаттағы басты өзгерістердің бірі — құны 20 000 АЕК-тен асатын мүлікті, оның ішінде «мемлекеттік тіркеуге жататын механикалық көлік пен тіркемені» ел аумағында және шетелде сатып алған ҚР азаматы, жеке тұлға — резиденттер табысы мен мүлкі туралы декларация тапсыруға тиіс.

Бұл ереже ретроспективті түрде 2025 жылғы 1 қаңтардан бастап күшіне енеді. Демек биыл және алдағы жылдары елімізде және шетелде сатып алынған құны 20 мың АЕК-тен асатын (78 640 000 теңге немесе 148.6 мың доллар) барлық автомобильді декларациялау керек.

Кіріс пен мүлік туралы декларацияны есепті күнтізбелік жылдан кейінгі жылдың 15 қыркүйегінен кешіктірілмей тұрғылықты жері бойынша тапсыру қажет. Яғни 2025 жылғы декларацияны 2026 жылғы 15 қыркүйекке дейін тапсырасыз.

Қазақстанда жаңа Салық кодексін қабылдауға дайындық жүріп жатыр. Құжат жобасында ескі көлікке салық жеңілдігін беру және құны 75 млн теңгеден асатын қымбат машинаға қосымша акциз енгізу туралы ұсыныс бар. Кодекс жобасы дайындалып жатыр.