Бір жыл бұрын қор жаңа жеңілдікті автонесие бағдарламасына оператор болып, «ӨКМ операторы» шотынан 100 млрд теңге алды. Ақша мен несие тез таусылып, тұрғындар наразылығын тудырды. Ұзақ үзілістен кейін ӨДҚ 2023 жылғы ақпанда қарыз алушылар қайтарған қаражатты қайта несиеге берді. Ол үшін арнайы онлайн платформа құрған, бірақ өтінім беру 18 секундта аяқталып, 761 көлік лезде иесін тапты. ӨДҚ жарты жыл дайындаған сервис шикі болып шықты. Сайт дұрыс жұмыс істемеді. Бұған сатып алушылар наразы болды, бағдарламаға министрліктің де көңілі толмады.
Содан бері олар автонесие бағдаламасын жаңартудың түрлі жолын қарастырып жатыр. Мысалы, аз қамтылған және көп балалы отбасыларға пайызы төмен несие беру немесе несие шартына бастапқы төлем мен табыс шегін қосуды ұсынды. Бірақ ӨДҚ мәселені шешудің басқа жолын тауыпты.
«Қор „Бәйтерек“ холдингі мен ҚР ИИДМ-ге бұл қаражатты жолаушы автобусын лизингіге беруге бағыттауды ұсынды. Жеңілдікті автонесие бойынша айына 120 адам машина алады, ал жаңа бағдарлама бойынша айына 15 мың жолаушы тасымалдайтын 20 автобус алуға болады» деп хабарлады ӨДҚ.
ӨДҚ қызметкерлері жеке тұлғаларға жеңілдікті автонесие беру бағдарламасына талдау жасап, ол іске қосылғаннан бері 13 335 тұрғын машина алғанын анықтады. Бірақ біздің елде халықтың 67 %-ы автобуспен жүреді, автобус паркінің 45 %-ы ескірген. Астана, Шымкент, Алматы, Ақтөбе, Қызылорда қаласында қоғамдық көліктің 25 %-ы тозған, бұл көрсеткіш Түркістан, Қарағанды, Тараз, Павлодар, Көкшетауда — 50 %, Ақтау мен Өскеменде — 60 %, Талдықорған, Петропавл, Оралда — 70 %, Қостанайда — 90 %.
Осы мәселені шешу үшін револьверлік жолмен жиналған ақшаны автобусты лизингіге беруге жұмсауды ұсынып отыр.
Елде шыққан автобусты лизингіге алу шарты мынадай:
- Лизинг мерзімі — 7 жылға дейін;
- Лизинг бойынша бастапқы төлем (аванс) — лизинг нысаны (автобус) құнының 15 %-ы;
- сыйақы мөлшері — жылына 7 %.
Комментариев: 0