Ескі жеңілдікті автонесие: бар-жоғы белгісіз бағдарлама

Бір апта бұрын Қазақстан даму банкі ескі бағдарлама әлі жұмыс істеп тұрғанын хабарлаған. ҚДБ өкілдері ол бойынша ай сайын орта есеппен 237 автонесие берілгенін айтты.

Жаңалық шыққан күні хабарласып, мынадай ақпарат алдық: бағдарламаға қатысып жатқан екінші деңгейлі банктер қазір автонесиеге өтінім қабылдамайды. Ал ҚДБ бұған мұның бәрі call-орталық операторының қателігі, бағдарлама жұмыс істеп тұр деп жауап берді. ҚДБ мәселені 29 мамырға дейін шешуге уәде берген. 30 мамырда Kolesa.kz редакциясына «бағдарлама әлі бар, оны тоқтату туралы әңгіме болған жоқ. Қаражат әр банкке әртүрлі тәсілмен түседі. Сондықтан банктер бағдарламаның белгілі бір кезеңінде қолда ақша жоқ екенін айтады» деп мәлімдеді. ҚДБ банкке хабарласқан азаматтарға дұрыс ақпарат беру мәселесін талқылағанын, енді операторлар тұрғындарға жағдайды дұрыс түсіндіретінін атап өтті.

31 мамырда қаржы ұйымдарына қайта хабарласып, ештеңе өзгермегенін білдік. Сall-орталық операторы ескі бағдарлама бойынша өтініш қабылдау тоқтағанын айтты. Банктер ҚДБ-дан ақша күтіп отыр екен. Қаражат түспесе, өтініш берген тұрғындарды кезекке қоя алмайды.

Жеңілдікті автонесие үшін екінші деңгейлі банктерге ешкім тағы ақша бөлмейді. Бағдарламаға қатысып жатқан банктер қазынадан миллиардтаған қаражат алып, оны пайызы төмен автонесие ретінде тұрғындарға берді. Енді автокредит алған азаматтар қайтарған қаржы есебінен жаңа несие беруге міндетті.

Демек ҚДБ ай сайын мемлекеттік бағдарлама жұмыс істеп тұрғанын айтып, есеп береді, ал банктер бағдарлама тоқтағанын айтып, өтінім қабылдамайды. Револьверлік тәсіл де жұмыс істемей тұр. Сонда ай сайынғы 237 автонесие қалай және кімге беріліп жатыр?