ҚР Индустрия және инфрақұрылымдық даму министрі Марат Қарабаев елде 9.3 млн тұрғын қоғамдық көлікпен жүретінін айтты. ИИДМ осы азаматтардың қажетін қанағаттандыруды басты назарда ұстап отыр.
«Револьверлік жолмен қайтқан қаржы жиналды. Жеңілдікті автонесиеден түскен ақшаны қоғамдық көлік алуға жұмсау мүмкіндігін қарастырып жатырмыз. Бірқатар облысқа бардық, жергілікті атқарушы орган несие арқылы автопаркті жаңартуды ұсынып жатыр. Мысалы, олар (қоғамдық көлік — Kolesa.kz ескертп.) Қостанайда 90 %, Талдықорған мен Оралда — 70% тозған», — деді министр. Осыған орай министрлік жеңілдікті автонесиені жеке машинадан гөрі қоғамдық көлікке бергенді жөн санап отыр.
«Қолда бар қаржыны барынша тиімді пайдалану қажет. Қаржы екі жерден бөлінеді. Соңғысы 100 млрд теңге бөлген Өнеркәсіпті дамыту қоры болды. Оған дейін револьверлік жолмен жұмыс істеп тұрған 82 млрд теңге болған. Автопаркті жаңарту үшін 100 млрд теңге қарастырып отырмыз», — деді министр.
ИИДМ бұл шешімін бүгін, 20 маусымда өтетін арнайы брифингте толық түсіндіреді.
Шенділер тағы біртүрлі идея ұсынып отыр. Бұған дейінгі аз қамтылған және көп балалы отбасыларға пайызы төмен автонесие беру, сондай-ақ несие шартына бастапқы төлем мен табыс шегін қосу жөніндегі ұсыныс та өте түсініксіз болатын. Мысалы, неліктен айына 500 мың теңге табатын көп балалы отбасы жеңілдікті автонесие ала алды, ал табысы 510 мың болса ала алмайды?
Енді револьверлік жолмен қайтқан ақшаға автобус сатып алуды ұсынып отыр. Министр автонесие алған тұрғындар 100 млрд теңгенің 1 миллиардын жақында қайтаратынын, бұл қаражатты 100-ге жуық автобус алуға несиеге беретінін айтты. Бұған дейін шенділер жылына автонесиеге 3 мың машина беруге уәде еткен. Яғни, жыл сайын банктерге 30 млрд теңге несие төлемі ретінде қайтады. Қазір он екі метрлік газбен жүретін автобус 100 млн, 9 метрлік 70 млн теңге тұрады. Демек револьверлік жолмен қайтқан 30 млрд теңгеге жыл сайын 300–400 автобус алуға болады. Бұл аз ба, көп пе деген сұрақ туады.
Қазақстанда қазір 20 әкімшілік аймақ (17 облыс, үш мегаполис) бар. Ақшаны тең бөлсе, әр өңір жылына несиеге 15–20 автобус алады. Алматы қаласы 2023 жылы 200 қоғамдық көлік сатып алуды жоспарлап отырғанын ескерсек, бұл түкке тұрғысыз сан екенін байқаймыз. Бірақ автобустары әбден тозған кей облысқа мұның өзі үлкен көмек болуы мүмкін.
20.06.2023 ж. 14:55-те қосылған мәлімет:
Арнайы брифингте ҚР Индустрия және инфрақұрылымдық даму вице-министрі Ілияс Оспанов хабарлағандай, жеңілдікті автонесие бағдарламасы жаңарады: екі бағдарламаның бірі ғана қалады, ал екіншісі несиеге автобус беретін бағдарлама болады.
«Бізде екі автонесие бағдарламасы бар. Біріншісі Қазақстан Даму банкі арқылы, екіншісі „ӨКМ операторы“ қаражатын пайдаланып, Өнеркәсіпті дамыту қоры арқылы жұмыс істеп тұр. Соңғы бағдарлама жаңарып, автобус алуға несие берумен айналысады. Ал Қазақстан Даму банкі жүргізіп отырған бағдарламаның шарты өзгереді», — деді министрдің орынбасары.
Ол бағдарламаны жаңартудан бұрын жергілікті атқарушы органдармен кездесу өткізгенін айтты, әкімдіктер 2 мың автобус алуға өтінім берген. Өтініштің жартысы Алматыдан түсіпті.
«Бұл бос сөз емес. Ақша бар, бірақ аз, бәріне жетпейді. Біздің міндет — „ӨКМ операторы“ қаражатын барынша тиімді пайдалану. Күн сайын қоғамдық көлікпен жүретін 9.2 млн тұрғынды сапалы автобуспен қамтамасыз ету қажет», — деді І. Оспанов.
Комментариев: 0