Қазақстанда жүргізушінің алкоголь ішкен-ішпегенін анықтау тәртібіне өзгеріс енетін сияқты. Сенат депутаты Жанна Асанова премьер-министрдің атына сауал жолдап, қазіргі тәртіп бірқатар жүйелі мәселені туындатып отырғанын айтты. Мысалы, медициналық тексеріс жүргізуге тек мемлекеттік зертханалар құқылы болғандықтан, сыбайлас жемқорлық қаупі жоғары.
Екі миллионнан аса адам тұратын Алматы қаласында осындай екі-ақ орталық бар. Яғни жүргізушіні наркологтар тексеруі қажет кезде зертханаға дейін ұзақ жүруге тура келеді, жұрт кезекте тұрып, уақыт жоғалтады. Оның үстіне сараптаманың дұрыстығына күмән туса, тәуелсіз тексерістен өтуге мүмкіндік жоқ. Өйткені заң мемлекеттік мекеменің қорытындысын ғана таниды. Мұндай жағдайды кей полицей өз пайдасына жаратып, «мәселені сол жерде шешуді» ұсынуы ықтимал.
ІІМ дерегінше 2025 жылы Қазақстанда мас күйінде көлік басқарған 23 мың жүргізуші ұсталған.
Сенатор мәселені шешу үшін жеке зертханаларға медициналық тексеріс жүргізуге рұқсат беріп, олардың қорытындысын заңды түрде мойындау керек, сондай-ақ азаматтарға медициналық мекемені таңдау құқығын берген жөн деп санайды.
Комментариев: 0