Моральдық тұрғыда ескірген Niva Legend-ті жетілдіру жұмысын АВТОВАЗ 2023 жылы бастаған. Өзгерістің басым бөлігі машинаның техникалық жағына қатысты, ал сырт пішініндегі басты айырмашылық — алдыңғы әйнектің түбіндегі ауатартқыштың қара пластик қақпағы мен жаңа дөңгелек дискісі ғана.
Капот астында 83 ат күшіне ие ВАЗ-21214 агрегатының орнында бұған дейін Niva Travel-ге орнатылған 1.8 литрлік 8 клапанды ВАЗ-11184 тұр. 90 ат күшіне ие (153 Нм) қозғалтқыштың арқасында машинаның алғашқы жүздікті еңсеретін уақыты 17-ден 15 секундқа қысқарды, ал орташа жанармай шығыны 9 литрге дейін төмендеді. Сондай-ақ салқындату жүйесі арнайы радиатор және желдеткішпен толықты.
Айналу моментінің артуына байланысты жартылай осьті, дифференциал сателлитін және бесінші беріліс тісті дөңгелегін күшейту қажет болды. Үлестіруші қораптың жаңа тірегі діріл деңгейін төмендетеді. Алдыңғы аспасы Niva Travel-мен бірдей болады. Сондай-ақ автомобиль «шнивадан» алынған желдетілетін тежеуіш дискісімен жабдықталған.
Модельдің капоты, шатыры, артқы есігі, алдыңғы панелі және артқы фартугі (яғни коррозияға ең көп ұшырайтын бөліктері) алғаш рет екі жақты мырышпен қапталды. Ал қанаты мен бүйірі қолжетімді бағасын сақтау үшін бұрынғы күйінде қалды.
«Грантадан» алынған толыққанды қауіпсіздік жастығы бар, биіктігі бойынша реттелетін рөл «Нива» үшін үлкен жаңалық саналады. Беріліс қорабының иінтірегі жүргізушіге жақын орналасқан, сондай-ақ смартфонға арналған қуыс пайда болды. Ірі пішінді детальдердің арқасында салонның дыбыс изоляциясы жақсарды, желдету жүйесі салон сүзгісі және тыныш жұмыс істейтін мотормен жабдықталды. Машинаны оталдыратын және есікті ашатын кілт ақыры біреу.
Бұл «Нива» тарихындағы ең ауқымды өзгеріс бағдарламасы екені анық. Жаңарған Niva Legend-тің бағасы қаншалық өзгеретіні жаз аяғында, модель Ресейде ресми саудаға шыққан кезде белгілі болады.
Мұндай Lada Niva Legend Қазақстанға келе ме, жоқ па, белгісіз. Қазір Ресейде жасалған автомобильге өте жоғары утиль алымы салынады. Бірақ АВТОВАЗ өнімдерін жақында Саран қаласындағы Eurasia Tech зауыты құрастыра бастайды. Зауыт Largus пен Granta шығарады, демек бұл қатарға «Нива» қосылуы әбден мүмкін.
Комментариев: 0