Қытай Сауда министрлігінің бас басқармасы «2027 жылы автомобиль мен мотоцикл экспорттауға лицензия алуға өтінімді қарау жұмысын тиісті деңгейде жүргізу туралы хабарлама» жариялады. Мекеме биыл өтінім онлайн қабылданатынын хабарлады. Жүйе 30 қыркүйектен бастап жұмыс істеп тұр. Қытайдан өзге елге машина жеткізуді жоспарлап отырған автоөндірушілер мынадай құжат ұсынуы қажет:
- Шетелдегі сатқан соң қызмет көрсететін желімен жасалған ынтымақтастық туралы шарт немесе келісім. Желіні экспорттаушы өз күшімен ашса, компанияның ресми мөрімен расталған өтініш.
- Сервис орталығы орналасқан мемлекет берген бизнеспен айналысу лицензиясы немесе жөндеу жұмысын жүргізуге рұқсат. Көлік жеткізілетін елде мұндай лицензия талап етілмесе, экспорттаушы компанияның ресми мөрімен расталған өтініш.
- Автомобиль мен негізгі компоненттерді жөндеу мүмкіндігі туралы өтініш беруші компанияның ресми мөрімен расталған сипаттама. Оған сервис орталығының интерьер және экстерьер суреті, техникалық қызмет көрсету жабдықтарын есепке алу журналы, қызметкерлердің кәсіби біліктілігін растайтын сертификат, қосалқы бөлшек жеткізілімі туралы мәлімет пен өзге де растайтын құжаттар қоса берілуге тиіс.
Министрлік хабарлағандай, экспорттаушы кәсіпорын белгіленген стандартқа сәйкес келетін бірнеше объектісі бар екенін растауы керек. Мысалы, 1-класты автоөндіруші* кемінде 50 сервис орталығы бар екенін дәлелдеуі керек. Мұндай талап автомобильдің түрленген нұсқаларын (арнайы, патрульдік, оқу көлігі және т.б.) шетелге шығаратын компанияларға да қойылады.
*1-класты автоөндіруші — толыққанды автомобиль шығаратын (OEM), ресми аккредиттелген ірі кәсіпорын. Олар экспортталған көлік құралын техникалық қамтамасыз ету бойынша барынша көп міндеттемені өз мойнына алады.
2026 жылы 1 қаңтардан бастап Қытайдан ескі машина экспорттауға заң жүзінде шектеу қойылған. Қазір мұндай көлікті Қытайдан шығаруға рұқсат алу үшін ол елде кемінде 180 күн, яғни жарты жыл тіркелген болуы қажет. Жаңа автомобильді экспорттауға болады, бірақ ол үшін зауыттың рұқсаты және шетелде көлікті сатқаннан кейін қызмет көрсету мүмкіндігі болуы шарт.
Жаңа тыйым параллель импортпен айналысатын компаниялар мен сұр импортшылардың жұмысын қиындатады. Шектеу Қытайда көлік шығарып жатқан Volkswagen сияқты шетел маркаларына да қатысты. Неміс бренді біздің елге Қытайдағы топтамасында бар модельдерін ұсынып жатқандықтан, ресми дилерлер де жаңа талаптарға сай қызмет етеді.
Комментариев: 0