Жаңа Camry-дің спидометрінде ақау бар

Toyota 2025–2026 жылдары шыққан 508 000 Camry-ді қазанда сервиске шақыруды жоспарлап отыр. Өйткені кейбір 7 дюймдік цифрлық аспаптар панелі көлікті қосқанда өшіп қалуы мүмкін.

Экранда автомобильдің жылдамдығы, сонымен қатар бұрылыс сигналының жұмысы мен ескертпе сияқты басқа маңызды ақпараттар көрінбейді. Дыбысты сигналдар да естілмейді. Сондықтан бұл ақау айтарлықтай маңызды.

Сервистік кампанияға LE, SE және Nightshade комплектациялары қатысады. Үздік XLE және XSE нұсқалары тізімде жоқ, себебі олар 12.3 дюймдік үлкенірек экранмен жабдықталады.

Шара Қазақстандағы Camry иелерін қамтымайды. Ресми дилерлер Жапонияда жасалған көліктерді сатады, ал жеке импорттаушылар негізінен седанның Қытайға арналған түрленімін әкеледі. Оларға қатысты кампания туралы ақпарат жоқ.