Оңтүстік астанада алғашқы диагональ жаяу жүргінші өткелі 2015 жылы пайда болды. Мамандар Әуезов — Тимирязев қиылысындағы жол таңбасын 202 жылдың мамырында салды. Қазір бұл қаладағы жалғыз диагональ өткел.
2024 жылы «Диагональ жаяу жүргіншілер өткелі» белгісі стандартқа қосылды, кейін Жол ережесіне де еніп, 5.16.3 нөмірін алды. Былтыр күзде Т тәрізді Достық — Жолдасбеков қиылысында бағдаршам жұмысы өзгерді.
Алайда жауапты орған бұл әзірге эксперимент деп, жол таңбасын салған жоқ.
Биыл 6 ақпаннан бастап Назарбаев — Гоголь және Абылай хан — Гоголь қиылыстары диагональ қозғалысқа көшті. Бір аптадан кейін Достық — Абай, Сейфуллин — Мақатаев және Абай — Алтынсарин көшесіндегі бағдаршамдар өзгерді.
Бүгінде Алматыда жеті қиғаш өткел жұмыс істеп тұр. Қала билігі мұндай схеманы басқа қиылыстарда іске қосуды жоспарлап отыр, бірақ қайда және қашан екені белгісіз. Барлығы сынақ нәтижесі мен жолдағы жағдайдың талдауына байланысты болады.
Диагональ өткел қаншалықты ыңғайлы
Оның үш негізгі мақсаты бар:
— барлық көлік тоқтағанда жаяу жүргіншілердің қауіпсіз өтуін қамтамасыз ету;
— үлкен қиылыстарда жылдам өтуге мүмкіндік беру;
— бұрылатын көліктерді тоқтамай өткізу.
Kolesa.kz редакциясы шағын зерттеу жүргізіп, көшені осылай кесіп өту тәсілін қала тұрғындары аса қолданбайтынын анықтады. Арнайы жол таңбасы және дағдының болмауы бұған себеп. Адамдар көшені кесіп өтуге болатынын білмейді. Әуезов — Тимирязев, Гоголь — Назарбаев және әсіресе Абай — Алтынсарин қиылыстарында халық диагональ өткелмен белсенді өтіп жүр.
Қалған бөліктерде адам аз.
Достық — Абай көшесінде қиғаш өтпей, жақын жердегі жаяу жүргінші өткелін пайдаланған ыңғайлы немесе бағдаршамның жасыл түсін күтпей, жерасты өткеліне түсуге болады.
Бұл жерге арнайы таңба салуға келмейді, себебі онсыз да үзік сызық көп. Қиғаш сызық қосылса жүргізушілер мен жаяу жүргіншілер шатасуы мүмкін.
Әуезов — Тимирязев қиылысында жол таңбасы болса да, жаяу жүргіншілер оны пайдалана бермейді. Қарбалас уақытта Тимирязевтегі кептелісте көліктердің арасымен жүру ыңғайсыз, әрі қауіпті. Тұрғындар «Атакент» маңындағы өткелмен жұмыс күндері (көлік аз кезде) немесе демалыста ғана көп жүреді.
Қорытынды
Редакция зерттеуіне сүйенсек бағдаршам фазасы мен диагональ өткел жаяу жүргіншілердің көңілінен шықты. Жүргізушілер де бұрылғанда адамды қағып кету қаупі азайғанын және жылдамдық артқанын байқады.
Осындай схема Абай — Әуезов, Абай — Гагарин және Абай — Манас сияқты басқа үлкен қиылыстарда болуы керек. Мұндай жерлерге жол таңбасын бірден салған дұрыс. Сол кезде халық өтуге болатынын және қалай жүру керегін түсінеді. Қиылыстан асықпай өту үшін бағдаршам фазасын 5 секундқа ұзартқан жөн. Сонда көлік қозғалысы бәсеңдемейді және оңға бұрылатын машиналар жиналып қалмайды.
Комментариев: 0