Mobility Global сарапшылары әлемдік автонарықтағы орташа бағаны талдап, оны сауда көлемімен салыстыра отырып, 2025 жылы электромобильдердің орташа бағасы 37 мың АҚШ доллары болғанын анықтады, бұл 2020 жылғы көрсеткіштен 9 % төмен деп жазды Nikkei Asia.
Электрлі көліктердің арзандауына кейінгі бес жылда литий-ионды батареяны өндіру шығынының 37 % төмендеуі әсер етті. Бұған Қытайдағы баға соғысы мен өндіріс көлемінің шамадан тыс артуы себеп болған, өйткені Қытай аккумуляторлар нарығының басым бөлігін бақылап отыр.
Қазір электромобильдің көбі құрамында қымбат кобальт жоқ литий-темір-фосфатты (LFP) батареяға көшіп жатыр. Бұл да бағаның түсуіне ықпал етті. Өйткені аккумулятор блогының құны электромобиль бағасының кемінде үштен біріне тең.
Ал осы кезеңде гибрид автомобильдердің орташа бағасы 16 % өсіп, 39 мың долларға жеткен. Бұған мұндай машинаның күштік құрылымы күрделене түскені әсер етті. Бес жылда бұл сала қарапайым жұмсақ гибридтен күрделі қосылатын гибрид (PHEV) пен тізбекті гибридке (EREV) көшті. Мұндай агрегат толыққанды іштен жанатын қозғалтқышты, беріліс қорабын, бір немесе екі электромоторды және күрделі басқару электроникасын қамтиды. Онымен салыстырғанда электромобильдің (әсіресе моножетекті) құрылымы өте қарапайым.
Қытайлық электрокар өндірушілердің әлемдік экспансиясы да бағаға әсер етіп отыр. 2020 жылы Қытай небәрі 100 мың электромобиль экспорттаса, былтыр көрсеткіш 1.64 млн данаға жеткен.
Комментариев: 0