Volkswagen 100 мың адамды жұмыстан шығаруы мүмкін

Volkswagen концернін жуырда үлкен өзгеріс күтіп тұр. Компания басшылары әлемнің әр түкпіріндегі өндіріс орындарын жауып, біраз маманды қызметінен босататынын талай айтқан. Алайда өз дереккөзіне сүйенген Manager Magazin шара бұдан да ауқымды болады деп жазды.

Басылым топ-менеджерлер 2030 жылға қарай жүз мың адамды жұмыссыз қалдырады деп ойлайды. Оның алдында 50 мың кісі кетеді деген болжам болған. Қазір концернде жалпы 657 мың маман еңбек етіп жатыр.

Дереккөз тағы бірнеше зауыт жабылатынын хабарлапты. Ганновер, Цвиккау және Эмдендегі кәсіпорындар мен Неккарзульмдегі Audi зауыты тоқтайды . Бұл процесс бірден емес, конвейердегі модельдердің өмір циклі аяқталған соң жүзеге асады. Ганновердегі кәсіпорын коммерциялық техникамен қатар ID. Buzz, California секілді вэндерді құрастырады. Цвиккаудағы зауыт ID.3, ID.4 және ID.5, Audi Q4 E-Tron, Q4 Sportback E-Tron, Cupra Born модельдерін өндіреді. Эмдендегі алаң D.4, ID.7 және ID.7 Tourer-ді, Неккарзульмдегі кәсіпорын A5, A6, A8 және E-Tron GT көліктерін жасап жатыр.

Компания мұнымен де шектелмейді екен. Volkswagen Group компонент жасайтын өндірушілерді өз құрамынан шығарып, инвестицияны азайтады.

Бренд басылым таратқан ақпаратқа қатысты пікір білдіруден бас тартты, бірақ оны теріске де шығармады.