Xpeng Америка нарығына шығуға ниетті

Xpeng Motors Қытайдағы 10 ірі электромобиль өндіруші тізіміне енеді. Компания көлік өндірісімен ғана шектелмей, сабақтас салаларды дамытып жатыр — пилотсыз роботакси, жолаушылар мультикоптері және адам тектес робот жасау.

Компанияның инженерлік деңгейі мен шығармашылық потенциалын шетел мойындаған. Мысалы, Volkswagen концерні жаңа электромобиль әзірлеуге осы марканың платформасы мен бағдарламалық жасақтамасын пайдаланып жүр.

Өзге қытайлық алпауыт өндірушілер сияқты Xpeng де модельдерін жыл сайын 16 млн жаңа машина сатылатын АҚШ нарығына шығарғысы келеді. WardsAuto-ға берген сұхбатында компанияның бас директоры Хэ Сяопэн бұл елдегі саяси бағыт өзгеріп, өздеріне онда зауыт салуға жол ашылады деп үміттенетінін айтқан. «Америка біз кіруіміз қажет ең маңызды нарықтардың бірі», — деді ол.

Xpeng қазір Қытайдан дайын машина экспорттаудан бөлек, Magna концернімен бірге Аустрияның Грац қаласындағы зауытта кроссовер мен лифтбек құрастыра бастады. Бұл түрлі шектеу шарасын айналып өтіп, ЕО нарығына шығуға мүмкіндік береді. Бірақ брендтің Қытайдан тыс жердегі жетістігі көңіл көншітпейді: 2026 жылдың алғашқы жартысында шыққан 165 977 автомобильдің 31 530-ы ғана басқа елдерде сатылды. Компания алдағы уақытта экспорттың үлесін жалпы өнімнің жартысына жеткізуді жоспарлап отыр.