Toyota жаңа V12 моторын жасауы мүмкін

V12 ақырындап қатардан шығып жатыр. Қазір мұндай күштік құрылым шығаратын өндірушілер өте аз. Toyota-ның да өз V12-сі (5 литрлік атмосфералы 1GZ-FE) болған. Марка оны ұзақ уақыт бойы Century седанына орнатып жүрді. Бірақ 2018 жылы оның үшінші буыны 425 ат күшіне ие гибрид V8 алды. Дегенмен компания бұл агрегатты қайта жаңғыртуы ықтимал.

Mag X хабарлағандай, 2027 жылы жарық көретін Century Coupe кроссовері бұрынғы болжам бойынша 4 литрлік битурбо V8-бен емес, қос турбоүрлемді әрі электрлі қондырмасы бар 6 литрлік V12-мен жүреді. Мұндай мотордың қуаты 800 ат күшіне жетеді.

Toyota жаңа күштік құрылымды жаңадан құрастыра ма, әлде қолданыстағы өнімдерін пайдалана ма, белгісіз. V12 екі қатарлы алты цилиндрлі қозғалтқышты біріктіру арқылы жасалады деген болжам бар, бірақ жүзеге асуы екіталай. Өйткені брендте қатарлы алты цилиндрлі агрегат жоқ. Toyota топтамасында Supra ғана осындай мотормен жүреді, бірақ оның өзін BMW жеткізеді.