Елде бензин мен дизель тағы қымбаттады

Қазақстанда жанармай бағасы тағы өсе бастады әрі өсім қарқыны жеделдей түсті. Мысалы, сәуірдің басынан маусымның аяғына дейін АИ-92 бензині мен дизель отыны шамамен 5 теңге қымбаттаған, ал шілденің алғашқы жартысында баға 4 теңге өсіп кетті.

Алматыдағы ірі жанармай құю желілері қазір АИ-92-нің бір литрін 249 теңгеден сатып жатыр, ай басында оның бағасы 245 теңге болған. Дизель бағасы 341 теңгеден 345 теңгеге өсті. Ал АИ-95 бензинінің бағасы өзгерген жоқ, Алматыда оны 321–328 теңгеден құюға болады.

14 шілдеде Астанада АИ-92 бензині 245–247 теңгеден сатылып жатыр, бұл да ай басындағы бағадан 4 теңге жоғары. АИ-95 бағасы өзгерген жоқ, ал дизельдің бір литрі 332–337 теңге тұрады.

Шымкенттегі жанармай құю бекеттері АИ-92-ні 232–235 теңгеден, АИ-95-ті 304–307 теңгеден, ал дизельді 340–343 теңгеден ұсынады. Яғни, 92 мен дизель 2–4 теңге қымбаттады, ал 95-тің бағасы өзгерген жоқ.

Айта кетейік, баға аздап өскенімен, Қазақстанда жанармай өңірдегі өзге елдермен салыстырғанда біршама арзан. Ресейдегі жанармай дағдарысына байланысты қазақстандық отынға сұраныс артып келеді. Осыған байланысты шенділер жанармайдың заңсыз экспортына бақылауды күшейтіп жатыр. Осы мақсатта шекарадағы автомобиль өткізу бекеттерінің маңында 59 полиция посты жұмыс істеп тұр. 2026 жылдың басынан бері автомобильге заңсыз жанармай багын орнатқан 255 дерек анықталды.