АҚШ-тың Жол қауіпсіздігін сақтандыру институты жаңа әдіс бойынша бір топ көлікті сынақтан өткізді. Бүйірден келген соққыны бейнелеуге массасы бұрынғыдан үлкен арба (1500 келі емес, 1905 келі) пайдаланылды әрі соққы сағатына 50 км емес, 60 км жылдамдықпен қозғалды. Осылайша инженерлер кроссовермен соқтығысуды сипаттады. Бұрынғы IIHS сынағы 15 жыл бойы қолданыста болған.
Toyota Camry, Nissan Altima, Chevrolet Malibu, Honda Accord, Hyundai Sonata, Volkswagen Jetta сынды алты орта көлемді танымал седан мен Subaru Outback универсалы сынақтан өтті.
Сынақ нәтижесінде бір модель ғана «жақсы» деген баға алды. Қалғаны нашар нәтиже көрсетті. Toyota Camry, Nissan Altima, Chevrolet Malibu тіпті «қанағаттанарлықсыз» (нашар) деп бағаланды.
Subaru Outback ғана жақсы баға алды. Мамандар бұған универсалдың өзге төрт есікті көліктерден биік болғаны әсер етті дейді. Дегенмен жүргізушінің жамбас сүйегі мен кеудесі жаралану қаупі бар.
Мамандар Hyundai Sonata мен Volkswagen Jetta-ға «қанағаттанарлық» (орташа) деген баға берді. Бірақ кореялық седан артқы, германиялық седан алдыңғы жолаушының жамбас сүйегін қорғай алмауы мүмкін.
Ал нашар баға алған үш седанның ішінде тәуірі Camry болды. Бүйірден келген соққы кезінде артқы орындықтағы манекеннің жамбас аумағында ғана ауыр жарақат тіркелді. Жүргізушінің жағдайы орташа деп бағаланды. Инженерлер бүйірлік қауіпсіздік пердесі манекеннің басын қорғамайтынын байқады, оның басы есікке соғылды.
Седан немесе универсал сияқты аласа машинаның мұндай краш-тесттен өтуі қиын екені байқалды. Бірақ қазір жолда кроссовер мен жол талғамайтын көліктер көбейіп кеткендіктен, осындай сынақ қажет екені анық.
Комментариев: 0