Toyota 7 цилиндрлі Camry жасады

Өткен демалыста Жапониядағы «Фудзи Спидвей» автодромында өткен Super Taikyu жарысы аясында Toyota өзіне қарасты тюнинг ательелердің екі ерекше жобасын таныстырды. Бренд шоу-карларды Camry-дің Жапонияға оралуына орай әзірлеген. Бұған Жапония мен АҚШ арасындағы сауда келісімі себеп болды. Седан автосалондарға жергілікті зауыттан емес, АҚШ-тың Кентукки штатындағы кәсіпорыннан барады.

Бірінші Camry-ді Gazoo Racing ательесі құрастырды. Мамандар седанға жалпақ қанат, жүксалғыш қақпағында ірі антиқанаты бар спорттық аэродинамикалық бастырық орнатты. Аспасы мен тежеуіші жаңарып, үлкен диск пен профилі төмен шина алды. Көліктің екі қозғалтқыштан тұратын жеті цилиндрлі күштік құрылымы 700 ат күшін береді.

1 / 6

1 / 6

Капот астына GR Yaris пен GR Corolla модельдеріндегі үш цилиндрлі G16E-GTS жайғасты. Артқы диванның орнын жаңа төрт цилиндрлі турбомотор (G20E) басты. Қозғалтқыштар алдыңғы және артқы дөңгелектерді айналдырады және механикалық қораппен синхронды жұмыс істейді.

Екінші «камри» Toyota Racing инженерлерінің қолынан шыққан. Ол 1970 жылдары пайда болған босодзоку стилінде әрленген. Автомобиль сұсты бастырық, төмен аспа және ұзын газ шығару түтігімен ерекшеленеді. Салонында алдыңғы панелі терімен қапталған, ортаңғы консольде хрусталь тәрізді күлсалғыш тұр. Аспаптар панелінің графикасы 1980 жылдарды еске салады. Мамандар трансмиссия тұтқасын мұз салған виски стақанына ұқсатып жасапты. Жоба авторлары интерьер арқылы Кентукки штатының атмосферасын көрсетуге тырысқан. Оң рөлді Camry 300 ат күшіне ие G16E-GTS-пен жүреді.

1 / 7

Екі машина сериялық өндіріске шықпайды. Шоу-карлар Акио Тойода мен Toyota Racing басшысы Хироки Накаджима арасындағы достық бәсекенің бір бөлігіне айналды. Мақсат — ерекше тюнинг жоба жасаудан қай команданың қиялы ұшқыр екенін анықтау. Жеңімпазды көрермендер таңдады.

Комментариев: 0