Tesla Еуропада Model S пен Model X-ті сатпайды

Tesla Еуропада Model S пен Model X электромобильдерінің саудасын тоқтатты. Бұл модельдерге енді тапсырыс беру мүмкін емес. Ресми сайтта тек дилерлердегі дайын көлікті сатып алуға болады. Tesla директорлар кеңесінің арнайы комитеті Илон Маскқа сыйақы берілетінін жариялады. Ол компанияның дамуына зор үлес қосқан құнды маман ретінде марапатталады.

Қазір тек Солтүстік Америка халқы Model S пен Model X-ке тапсырыс бере алады. Қытай сияқты басқа өңірлерде бұлардың саудасы тоқтаған, Tesla өкілдері қоймадағы қалған машиналарды ғана сатып жатыр. Барлық көлік өткен соң бұл модельдер Еуропа нарығынан толығымен кетеді. Бренд екеуінің орнын басатын өнімдер туралы ештеңе айтпады.

Tesla жақында жаңарған арзан Model 3 пен Model Y-ды жақсартып жатыр, алдағы уақытта жаңа модификация қатарға қосылады. Мысалы, Model Y кроссоверінің дөңгелек базасы ұзарған және үш қатарлы орындықтары бар нұсқасы жарық көреді.

Осы жаңалықтар аясында Tesla директоры әрі компанияның ең ірі жеке акционері Илон Маск алатын сыйақы туралы ақпарат тарады. Директорлар кеңесінің арнайы комитеті оған 96 миллион көлемінде акция бермекші. Reuters агенттігінің есептеуінше оның құны 29 миллиард доллардан асады.

Комитеттің мәлімдемесіне сәйкес Маск Tesla мен индустрияға қосқан үлесі үшін сыйақы алады. Бұл оны компанияда қалуға ынталандыруға тиіс. Қазір Tesla электромобиль саласындағы көшбасшыдан робототехника мен жасанды интеллект саласындағы жетекшіге айналып келеді. Акция пакеті Маскты кемінде тағы екі жыл басшы қызметінде қалуға міндеттейді.

Сыйақы өтемақының бір бөлігі, себебі Маск 2018 жылдан бері атқарған еңбегі үшін 50 миллиард доллар алуы керек еді, бірақ акционерлердің бірі аталған сома тым артық деп шағымданып, былтыр Делавэр штатының соты төлемді бұғаттаған.