Жаңа көліктің көрсетілімі Лас-Вегастағы CES 2020 жаһандық көрмесі аясында өтті. Мобильді құрылғылар, теледидар, компьютерлік ойындар шығаратын Sony автокөлік ұсынады деп ешкім күтпеді. Жапониялықтардың мұндай қадамға не үшін барғанын кейінірек баяндаймыз, ал қазір темір тұлпарға толығырақ тоқталсақ.
Электрлі Sony Vision-S көлемі жағынан Tesla Model 3-ке жақын, дегенмен төрт есікті көліктің сырт келбеті Porsche Taycan мен Lucid Air-ге көбірек ұқсайды. Машина заманауи, бірақ сүреңсіздеу көрінеді, себебі ешқандай шығармашылық ерекшелігі жоқ. Десе де Vision-S жәй ғана көрмеге арналған зат емес — оның негізінде Magna Steyr-дің модульдік платформасы жатыр. 280 ат күшіне ие электромоторы бар. Максимал жылдамдығы сағатына 240 шақырымды құрайды.
Vision-S интерьері электроникаға толы. Панелі бес экраннан тұратын галерея іспетті. Жолаушыға арналған экран ғаламторға кіріп, кино көруге мүмкіндік береді. Ортаңғы консольдегі тачскрин климатты басқаруға жағдай жасайды және бірқатар көмекші функцияларға ие.
Мұндай салонның философиясы қарапайым: Vision-S өздігінен қозғалуға қауқарлы, ол жүргізушінің көмегіне сирек жүгінеді. Автономды басқару мен адамның жай-күйін бақылау функциясына 33 сканер, CMOS және ToF жүйесі жауап береді.
Комментариев: 0