Škoda қазір әлемде кроссоверлердің танымал екеніне қарамастан, Vision O концептісін универсал шанағында ұсынды. Марка осы прототип арқылы фирмалық стильдің даму бағытын көрсеткісі келген, дизайны осыған ұқсас универсал жасауды да жоспарлап отыр.
Škoda Modern Solid деп аталатын жаңа философиясын Tech Deck маскасымен бірге машиналарына пайдалана бастады. Vision O концептісінің алдыңғы бөлігі Tech Loop деп аталады. Күндізгі жүріс шамы мен ауатартқышы бар бампер ерекше көрінеді. Капот жиегін бойлай орналасқан сәнді жарық жолағы қанатпен біріккен шағын бұрылыс шамымен үйлесіп тұр. Жарық техникасы анимациялық суреттен бөлек универсал автономды режимге ауысқанын хабарлайды.
Бүйіріндегі визуалды акцент шанақтың ортасындағы қырлы және алды-артындағы күңгірт тіректерге байланысты ортаға ауысқан. Мамандар көлікке отыру ыңғайлы болу үшін екі жаққа ашылатын есік орнатты. Әдеттегі тұтқа орнында сезгектер тұр.
Салоны біршама қарапайым көрінеді. Басты жаңалық — алдыңғы әйнекті бойлай орналасқан ұзын әрі жіңішке Horizon дисплейі. Оның ұзындығы — 1.2 метр. Ортаңғы тачскрин де көзге түседі. Дизайнерлер батырмадан бас тартқан жоқ, рөлде бұрылыс сигналын реттегіш, шынтақ қойғышта ірі «шайба» тұр.
Автомобильдің техникалық сипаттамасы жайлы ақпарат жоқ. Škoda Vision O электрлі болады. Универсалдың өлшемі — 4850×1900×1500 мм. Яғни шоукар қазіргі «Октавиядан» үлкен болады. Компания қазіргі модельді жаңа нұсқаға келер онжылдықтың басында ғана алмастырады. Демек сериялы Octavia электрокарға айналғанға дейін бірнеше мәрте жаңарады.
Комментариев: 0