ҚР Қаржы министрлігі Мемлекеттік кірістер комитетінің мәліметінше биыл азаматтар кедендік рәсімдеу кезінде 1164 көліктің құнын 300–3000 доллар аралығында көрсеткен. Мысалы, 2020 жылғы Hyundai Santa Fe құжатта 300 долларға, ал 2020 жылғы Toyota Camry 1300 долларға сатып алынды деп жазылыпты.
Грузиядан келетін, шыққанына үш жыл болмаған Toyota Camry туралы айтсақ, импорттаушылар олардың құнын 1300–17 500 доллар (орта есеппен 11 000) деп көрсетеді. Кеденшілер аталған елдің машина сататын сайттарын тексеріп, мұндай көліктер жағдайы жақсы болса 20 000–27 000 доллар, ал бүлінгені 12 000–18 000 доллар тұратынын анықтады.
Қазақстандықтар премиум машинаның да құнын төмендетуге тырысады. Мысалы, 2021 жылғы Mercedes-AMG G63 — 8500, 2021 жылғы Toyota Land Cruiser 300 — 15 000, 2021 жылғы Lexus RX 450H 4500 доллар деп жазылған.
Кеденшілер биыл жыл басынан бері елге әкелінген көліктердің құны 53 млн долларға төмен көрсетілгенін анықтап, олардан 6.5 млрд теңге қосымша кедендік салық өндіріп алды.
Қызметкерлер кеден құнын қалай есептейді? МКК кедендік ресімдеу кезінде қолданылатын баға ойдан шығарылмайтынын айтады. Олар елге келетін көлікке маркасы, моделі, әкелінетін ел мен баға ауқымына қарай жүйелі түрде талдау жасайды. Тұрғындарға ыңғайлы болу үшін Мемлекеттік кірістер комитетінің сайтында қазіргі бағалар жазылған каталог жарияланды. Ол жерден кедендік алым мөлшерін көріп, оны алдын ала есептеуге болады.
МКК егер машина иесі оны сатып алғанын растайтын құжат ұсынса (сатып алу/сату шарты, инвойс, чек және т.б.), кедендік рәсімдеу декларацияда жазылған құн бойынша жасалатынын айтады. Бірақ кедендік ресімдеу кезінде келісімшартта көрсетілген сомаға қарамастан салық каталогтағы баға бойынша есептелген жағдайлар бар екені жасырын емес.
Комментариев: 0