Импорттаушылар кедендік алым мөлшерін төмендету үшін елге көлік әкелген кезде бағасын арзан көрсетуге тырысады. ҚР Қаржы министрлігінің Мемлекеттік кірістер комитеті биыл жыл басынан бері Қазақстанға келген көліктердің құны 53 млн долларға төмен көрсетілгенін хабарлады. Кей машинаның бағасы тіпті ондаған есе арзан жазылған. 2020 жылғы Santa Fe-ні 300 долларға сатып алуға бола ма? Бұған ешкім сенбейтіні анық.
Комитет Kolesa.kz редакциясына қандай жағдайда көлік бағасы шындыққа сай келмейді деп қарастыратынын түсіндірді:
- кедендік алымға әсер ететін ақпарат пен сол тауарға қатысты басқа құжаттағы мәлімет сәйкес келмесе;
- көрсетілген баға мен кеден органының ақпараттық жүйесіндегі (каталогтағы*) мәлімет сәйкес келмесе;
- тауар құны жағдайы бірдей немесе ұқсас тауардың бағасынан төмен екені анықталса.
* Каталог құрастыруға қажетті ақпарат Қазақстан және ЕЭО-ға мүше елдердің сыртқы сауда басқармасының тауарға арналған декларациясынан, үшінші елдердегі мемлекеттік мекемелер (сауда өкілдіктері) мен ұйымдар (кәсіби бірлестік, көлік және сақтандыру компаниясы, әкелінетін тауармен ұқсас тауар өндірушілер) мәліметінен алынады. Ақпарат заңмен тыйым салынбаған тәсілмен жиналады.
Егер көлік өзге елден шынымен төмен бағада сатып алынған болса ше? Бағаны растау үшін импорттаушы ЕЭО Кедендік кодексінің 108-бабына сай мына құжаттарды ұсынуы қажет:
- сыртқы саудадағы сатып алу/сату шарты;
- жеткізуші берген шот-фактура (инвойс);
- банк құжаты (егер есеп сыртқы сауда шартының талабына байланысты төленсе), сондай-ақ тауар құнын көрсететін өзге де төлем құжаттары;
- келісімшартта белгіленген мәміле шартына байланысты сақтандыру құжаты;
- тасымалдау келісімшарты, тасымалдауға арналған шот-фактура (инвойс) немесе тасымалдау құны туралы құжат.
Ал көліктің бағасы каталогтағыдан айтарлықтай ерекшеленетін болса, импорттаушыда мына құжаттар болғаны жөн:
- өндіруші немесе автодилердің прайс-листі, оның коммерциялық ұсынысы;
- тауармен бірдей, сондай-ақ онымен бір түрдегі тауарды сатушының прайс-листі, коммерциялық ұсынысы;
- сатушының сатып алушыға жеңілдік жасау негізі мен шартына қатысты түсіндірме. Сатушы сізге жеңілдік жасағаны (бастапқы бағасынан қанша төмен) туралы анықтама.
Бұл заң бойынша осылай. Бірақ кеденде қалай болып жатқанын импорттаушылар біледі. Сіз машинаңызды инвойстағы баға бойынша рәсімдей алдыңыз ба? Пікір жазсаңыз болады.
Анықтама ретінде: автокөліктің кедендік алымына шот-фактурада көрсетілген тауар (машина) бағасы, сондай-ақ көлікті шекараға дейін жеткізу, тиеу/түсіру, шекараға дейінгі сақтандыру, комиссия және делдалдық қызмет құны секілді шығындар мен кедендік ресімдеу ақысы енеді.
Комментариев: 0