Оқырмандар Kolesa.kz-ке хабарласып, кедендік тазартудан өткен, бірақ толық тіркелмеген, яғни Қазақстанда техпаспорт пен мемлекеттік нөмір алмаған автомобильді сатуға бола ма деп сұрады. Бұл сауалға Өнеркәсіп және құрылыс министрлігі Интеграция және халықаралық ынтымақтастық департаментінің директоры Әділбек Бектібаев жауап берді.
Қазақстанда автомобильді бастапқы тіркеусіз сату фактісі шынымен бар. Бастапқы тіркеу процедурасынан өтпеген машина ҚР ІІМ базасында болмағандықтан, сатушы мен сатып алушы ЭЦҚ арқылы шартқа қол қойып, көлікті онлайн есепке қоя алмайды. Нотариус арқылы автомобильді заңды түрде сату мүмкін емес, өйткені заңгерлер де жүйе дерегін тексеріп, техпаспорт сұрайды.
Нәтижесінде екі тарап өзара қол алысады, ал сатып алушы автомобильді тіркеу үшін импорттаушыдан алған құжаттарымен арнайы ХҚКО-ға барады. Бірақ бұл заңсыз әрекет.
«Жеке тұлға Қазақстанға үшінші елден әкелген көлік құралын иеліктен шығару үшін меншік құқығын растауы қажет, ол үшін машинаны бастапқы тіркеу керек. Көлікті есепке қояр кезде алым-салықтың бәрін көлік құралын шетелден әкелген жеке тұлға төлейді. Яғни өзге елден кірген машинаны бастапқы тіркеусіз иеліктен шығаруға тыйым салынады», — деді А.Бектібаев.
Неге? Бұл ереже көлеңкелі көлік саудасын азайтып, жеке тұлғалардың машина сатудан тапқан табысынан салық төлеуін қамтамасыз етеді.
Мысалы, жеке тұлға өзі пайдалану мақсатында бірнеше машина әкеліп, кейін оларды сатса, бірақ ешбірін есепке қоймаған болса, салық органдары оның коммерциялық қызметін қадағалай алмайды. Өйткені мұнда бастапқы тіркеу және кейіннен есептен шығару фактісі болмайды.
Өнеркәсіп және құрылыс министрлігі автомобиль тіркеу ережесіне түзету енгізуді жоспарлап отыр, енді арнайы ХҚКО-лар машинаны алғаш есепке қойған кезде оның бір адамның атына тіркелгеніне көз жеткізу үшін құжаттарды тексереді.
Көлік иесі автомобиль кеденде рәсімделген соң 10 күн ішінде тіркеуге міндетті. «Жол жүрісі туралы» заңда осындай талап бар.
Комментариев: 0