Жуырда үкімет отырысында Олжас Бектенов дауысы жер жаратын көлік тізгіндегендерді қамау керек деген. Бүгін «Әділет» фракциясының мүшелері осындай техникамен күресудің бірнеше жолын атады.
ІІМ басшысына сауал жолдауға түнде ұйқысы бұзылған халықтың шағымы себеп болыпты. Депутаттардың сөзінше қаланың орталық көшелері мен даңғылдарда мотокөлік және тюнингті машина иелері үнемі жарыс өткізеді. Олар аса жылдам қозғалып, тұрғын үй маңында әдейі қатты дыбыс шығаратын көлікпен жүйіткиді.
Бұл мәселе әдеттегі ереже бұзу шеңберінен шығып кеткелі қашан. Ол азаматтардың демалып, тыныштықта дамылдауға құқығын қатаң бұзып, қоғамның қауіпсіздігіне қатер төндіреді. Алайда кей себеппен заң бұзушылар жазасыз қалады:
- Мұндай жағдай өте сирек тіркеледі. Бәрі тек халық шағымданғанда анықталады. Ал бірқатар елдің тәжірибесі онымен тиімді күресуге болатынын көрсетті. Мәселен, АҚШ-та автоматты акустикалық камералар қолданылады, полиция ұсталған адамның көлігін алып қояды. Германия мен Францияда тәртіп сақшылары жылжымалы зертханасы бар техникамен рейдке шығады.
- Жазаның тым жеңіл болуы. Қолданыстағы айыппұл небәрі 5 АЕК (21 625 теңге) және ол есерсоқтарға тосқауыл бола алмайды.
Жағдайды түзеу үшін олар полицияға мынадай шара қолдануды ұсынды:
- Шу деңгейінің шектен асқанын анықтайтын арнайы акустикалық кешендер мен шуөлшегіштер орнату.
- Түнде жарыс өткізуге жол бермеу, газ шығару жүйесін заңсыз өзгерткендерді анықтау үшін патруль полициясы мен учаскелік инспекторлардың тұрақты экипажын құру.
- Ереже бұзғандардың көлігін техникалық ақауды жойғанша айыптұраққа қою.
- Түнде тыныштықты бұзатындарға қатысты жазаның мөлшеріне баға беру.
- Қоғамды қасақана сыйламау критерийлері мен дәлелдер базасын жинау тәртібін нақты бекіте отырып, ұсақ бұзақылық секілді жол ережесін бұзу түрлерін саралау алгоритмін әзірлеп, енгізу.
Әкімшілік кодекстің
Билік жол ережесін өрескел бұзатындарды бір жылға куәлігінен айыруды да жоспарлап отыр. ІІМ заңға енетін жаңа нормаларды дайындауға кірісіп кетті.