Жазда бензин сапасы не себепті нашарлады

Ел тұрғындары биыл жаздың аяғында 95, 98 маркалы бензин сапасына шағымданды. Әлеуметтік желіде жүргізушілер бүлінген көлігін көрсетіп, жөндеуге мәжбүр болғанын жазып жатты.

Жиырма бесінші тамызда энергетика министрі Ерлан Ақкенженов ведомство Павлодардағы мұнай өңдейтін зауыт шығаратын отынның сапасын тексеруге кіріскенін хабарлады. Ал зауыттың баспасөз қызметі бізде бәрі стандартқа сай деп мәлімдеді. Ізін ала Сауда министрлігінің өкілдері тәуелсіз зертханаға тікелей кәсіпорыннан алған үлгілерді жіберді. Одан бөлек, Sinoil, QazaqOil және Helios желілерінен сынама алды. Сол кезде депутаттар да осы мәселені алға тартып, премьер-министрге жүгінген.

Сапасыз жанармайдың кесірінен мотор өшіп қалды дейтіндер уақыт өте азайды. Депутаттардың сауалына жауап берген Олжас Бектенов жыл басынан бері Сауда министрлігіне қарасты Техникалық реттеу және метрология комитеті жанармай сататын орындарда 76 бақылау шарасын жүргізді деді. Зертханадағы тексеріс нәтижесінде үш үлгі (Алматы, Қызылорда облысы және Жетісу облысы) талапқа сай келмейтіні анықталған. Мамандар заңнамаға сай шара қолданыпты.

Солтүстік өңірдегі тұтынушылардан арыз түскен соң ведомствоаралық комиссия құрылып, Энергетика министрлігі, ТРМК, «ҚазМұнайгаз, KAZENERGY, профильдік зертханалар мен стандарттау комитетінің өкілдерінен құралған топ мұнай өнімдерін шығаратын және сататын желілерді тексерді. 2026 жылғы 25 тамызда кәсіпорын тексерістен өтті. Зерттеу барысында зауыттағы үлгілердің мемлекеттік стандартқа сай екені расталды.

Үкімет басшысы жоғарыда аталған комиссия бензинді өндіруден тұтынушыға берген сәтке дейінгі бүкіл технологиялық, логитстикалық процесті назарға алатынын атап өтті. Аудит қорытындысына сай отын сапасын бақылау процесін күшейту бойынша бірнеше шара қабылданады.

Премьер-министр «Тұтынушылардың құқығын қорғау туралы» заңның 31-бабына сайкес тауардағы кемшілікке байланысты тұтынушының өміріне, денсаулығына не мүлкіне зиян келсе, шығынның орнын толтыруға сатушы міндетті деп жазылғанын атап өтті. Ал Азаматтық кодекстің 947 және 948-баптарына сай тауардағы кемшіліктің салдарынан келген зиянды сатушы (дайындаушы) бәрібір өтеуге тиіс.

Демек, сапасыз бензинді пайдалану салдарынан автомобилі бүлінген тұтынушы сатушыдан не өндірушіден шығынды өтеуін талап етуге құқылы. Бірақ жеткізу тізбегіндегі мұнай өнімінің сапасының нашарлауына кінәлі қатысушыны құзырлы орган заңнамада көзделген процедуралар шеңберінде анықтайды және бұл тұтынушының тиісті талап қоюына кедергі болмайды.

Алайда сатушыларды жауапқа тарту мүмкін болмай тұр. Себебі машинаның багын бір бекетте толтырғанда онда басқа колонкадан құйған жанармай қалып қоймағанын және агрегаттың бұзылуына сол ықпал етпегенін дәлелдеу өте қиын. Kolesa.kz дерегінше жанармай бекетінен өтемақы алған бір адам жоқ. Дегенмен, сондай жағдай басыңыздан өткен болса, пікір жазыңыз.