Мәжіліс трассадағы жылдамдық шегін өзгертуді талқылап жатыр

Депутат Болатбек Нажметдинұлы премьер-министрдің бірінші орынбасары Нұрлан Байбазаровқа сауал жолдады. Ол азаматтар мен жүргізушілерден республикалық маңызы бар трассалардағы жылдамдық режиміне қатысты көптеген өтініш пен шағым түседі деді. Төрт жолақты, толық қоршалған және қауіпсіздік талаптарына сай келетін елді мекендерге жақын магистральдарда бірнеше шақырым бойы 60 км/сағ жылдамдық шегі сұрақ тудырады.

«Мұндай бөлікте жаяу жүргіншілер жолға шыға алмаса, қарсы бағыттағы көлік ағыны толық бөлінген болса және қауіпсіздікті қамтамасыз етуге арналған барлық инженерлік шешім жасалған болса, мұндай шектеудің қажеттілігі неде?» — деп сұрақ қойды депутат.

Б. Нәжметдинұлының айтуынша халық дәл осындай жол бөліктерінде жылдамдық қауіпсіздік мақсатында деген желеумен әдейі төмендетілген дейді. Полиция тарапынан бақылау күшейіп, жылдамдық режимін қадағалау қатаңдаған. Соның салдарынан көптеген жүргізуші жол қауіпсіздігінен гөрі айыппұл арқаламауды көбірек ойлайды. Айыппұл мөлшері он, кейде жүз мың теңгеге жетеді.

Мәжіліс депутатының сөзінше тағы бір маңызды мәселе түсініксіз болып отыр: неге республикалық маңызы бар жолдарда жылдамдық режимі әртүрлі?

Кейбір облыстағы трассада жылдамдық шегі — 120–140 км/сағ. Ал техникалық сипаттамасы дәл осындай Түркістан — Шымкент сияқты бағытта шектеу әлдеқайда қатаң. Соған қарамастан тарифтері бірдей.

Депутат жолдардың категориясы мен қауіпсіздік талаптары бірдей болса, жүргізушілерге қойылатын талаптар да сондай болуға тиіс дейді. Осыған байланысты ол мынадай ұсыныс жасады:

• «Батыс Еуропа — Батыс Қытай» халықаралық көлік дәлізінде және республикалық маңызы бар басқа жолдарда қолданыстағы жылдамдық режимдерін кешенді тексеру.
• Қауіпсіздік талаптарына толық сай келетін, қоршалған және қарсы бағыт толық бөлінген трасаада рұқсат етілген жылдамдықты кезең-кезеңмен арттыру мүмкіндігін қарастыру.
• Жаяу жүргінші жүрмейтін және қауіпсіздік талаптары сақталған елді мекендер маңындағы жол бөліктерінде жылдамдықты 60 км/сағ дейін шектеудің негізін талдау.
• Республикалық маңызы бар автомобиль жолдарындағы жылдамдық режимін белгілеудің бірыңғай критерийлерін қайта қарап, олардың өңірлерде әртүрлі қолданылатын түсіндіру.