Seat жабыла ма?

Volkswagen концернінің оңтайландыру жоспары аясында Германиядағы төрт ірі зауытпен қатар испаниялық Seat бренді жабылуы мүмкін. WirtschaftsWoche басылымы хабарлағандай, Seat концерннің ұзақ мерзімді даму жоспарынан шығып қалды, 2029 жылдың аяғына қарай қызметін тоқтататын сияқты.

Компания жабылған соң бұрынғы міндеттемелерін орындап, клиенттерді қолдауды (сервистік қызмет көрсету) жалғастырады. Өндірістік база мен сату бөлімі 2018 жылы Seat-тан бөлініп, жеке брендке айналған Cupra-ға қосылады.

Статистикаға қарап, менеджменттің бұл шешімінің себебін түсінуге болады. 2025 жылы Seat пен Cupra бірге 586 300 автомобиль сатып, рекорд жаңартты. Бірақ Cupra-ның саудасы 33 % артса, Seat-тың үлесі 17 % кеміді. Концерн алда тек Cupra-ны дамытуға күш салып, жылдық сауда көлемін 500–600 мың машинаға жеткізуді жоспарлап отыр.

76 жылдық тарихы бар компанияның жабылуы Испания жұртына ұнамасы анық. Бірақ марка тарағанымен, Марторельдегі негізгі зауыт жабылмайды. Онда Seat-тың Ibiza, Arona және Leon модельдерімен қатар Cupra Raval және Volkswagen ID.Polo шығады.