Қытай билігі автоөндірушілердің қарқынды жұмысын құптамайды

Қытайлар екі жылда жаңа көлік әзірлесе, батыстағы әріптестері бұған кем дегенде 3-5 жыл жұмсайды. Дегенмен жасанды интеллектінің көмегімен мерзімді 18 айға дейін қысқартуға болады. Азиядағы автомобиь зерттеу саласындағы аса ірі компаниялардың бірі IAT Automobile Technology осылай ойлайды, оны Қытайдың автоөндірушілер қауымдастығы да қостап отыр.

Біраз уақыт бұрын «ақылды» есік тұтқасынан бас тартып, аккумулятор мен жүргізуші көмекшілеріне қатысты талапты күшейткен ел билігі бұған қарсы. Шенділер көлік құралын сертификаттау нормативтерін де қайта қарауға дайын.

Техниканың беріктігін физикалық жолмен тексеру виртуал жобалау мен математикалық есеп арқылы сынауға қарағанда жылдам жүзеге аспайтынын ескерген билік жаңа энергия көзімен жүретін автомобильді (EV, гибрид, сутекті көлік) тестілеу ұзақтығын 30 мың шақырымға жеткізді деп жазды Bloomberg. Тіпті құзырлы орган бір жыл бойы зауыттан шыққан техниканы кез келген уақытта тексеру кампаниясын өткізеді.

Алайда сала өкілдері жаңа өнімді шығару уақытын шегеру брендтердің бәсекелестік қабілетін кемітіп, шығын мөлшерін арттырады деп санайды. Geely-дің басшысы Ли Шуфу CCTV арнасына берген сұхбатында бәрі жаппай көш бастауға талпынып жатқан шақта маркаларды баяу жұмыс істеуге мәжбүрлеу ақылға сыймайды деді.