Биылғы жыл ерекше болмақ. Нарықтағы баға жақсы жаққа өзгере қоймаса да, шығарылып жатқан көлік саны артып келеді. 2019 жылы отандық темір тұлпарлардың ай сайынғы үлесі 50 %-дан төмен түскен емес. Былтыр «Қазақстанда жасалған» деген жапсырмасы бар көліктерге деген сұраныс 49 %-ды құраса, биыл бұл көрсеткіш 58 %-ға дейін артты.
ҚАБА хабарлағандай, 2019 жылдың тоғыз айында Қазақстанда 33 500 көлік құралы өндірілді, бұл өткен жылғы қаңтар-қыркүйек аралығындағы көрсеткіштен 47.5 %-ға артық. Ақшалай есептегенде де, биылғы нәтиже былтырғыдан 62.5 %-ға (229 млрд теңге) жоғары.
Сатылымның басым бөлігі 29 846 данасы (+41.2 %) шығарылған жеңіл көліктердің үлесінде. Жүк көліктерінің өндірісі екі жарым есе — 2 133 дана (+166 %), автобус өндірісі үш жарым есе — 848 дана (+267 %) артты. Сонымен қатар, биыл 613 тіркеме мен жартылай тіркеме (+58 %) және 60 дана арнайы техника шығарылған. Былтыр үздіктер көшін бастаған өскемендік «Азия Авто» (Lada, Kia, Skoda, Uaz) биыл 14 443 техника өндіріп, 16 442 көлік құрастырған «СарыарқаАвтоПромнан» (Hyundai, JAC, Ravon) сәл кейін қалып қойды. Осы жылы қостанайлық кәсіпорынның көлемі екі есе артты! Одан бөлек, СеМАЗ «газельдерінің» өндірісі де нәтижені айтарлықтай жақсартты. Жыл соңына дейін олар 3 000 коммерциялық техника шығаруды жоспарлап отыр.
Біздің автоөндіріс өз тарапына жиі айтылатын сынға қарамастан, қарыштап дамуын жалғастыруда және отандық машинажасау саласының ең маңызды әрі болашағынан зор үміт күттіретін салаларының бірі болып келеді. Осы көрсеткіштер сақталған жағдайда ҚАБА нарықтың 70 мың межесінен асатынын жоспарлап отыр және оның ішінде 40 мың көлік отандық өндіріске тиесілі болады.
Комментариев: 0