Ресейдегі бұрынғы Hyundai зауыты GAC атауымен көлік шығарады

Санкт-Петербургтегі Hyundai зауытын қайта іске қосу үшін мамандар ерекше тәсіл ойлап тапты. «Русский автомобиль» телеграм-каналы таратқан мәліметке сүйенсек, «Авилон» дилері қытайлық GAC концернімен бірге зауытты қайта іске қосып, бұрынғыдай Hyundai модельдерін құрастырады. Бұл іске Қазақстандағы Hyundai Trans Kazakhstan кәсіпорны да қолғабыс етуі мүмкін.

Инсайдерлер 2024 жылдың басында кәсіпорын Hyundai Solaris және Creta, сондай-ақ Kia Rio өндірісін қалпына келтіреді деп мәлімдеді. Көліктер зауытта сақталып қалған бөлшектерден жасалады. Алдын ала болжам бойынша қойма қоры шамамен 70 мың машина шығаруға жетеді, бірақ жоба басшылары жетіспейтін бөлшектерді Қазақстаннан сатып алу мүмкіндігін қарастырып жатыр.

Санкт-Петербургтегі зауыт Hyundai брендін лицензия жоқтығынан пайдалана алмайтындықтан, GAC брендімен седан мен кроссовер сатуды жоспарлап отыр, сол үшін қытайлық концернмен серіктестік қажет. Қолданыстағы компоненттер бір жарым жыл ішінде пайдаға жаратып, содан кейін ірі торапты әдіспен автомобиль құрастыруға көшуі мүмкін.

Бұл жоспарды AGR Automotive Group компаниясы жүзеге асырады. Бұрынғы атауы «Фольксваген Груп Рус» болған құрылымға Калугадағы бұрынғы VW зауыты тиесілі, ал компанияның өзі «Авилон» дилер холдингіне жақын саналады. Дегенмен AGR зауытын қайта іске қосу үшін алдымен актив сатып алу керек. Канал дереккөздері мәміленің аяқталуына аз қалғанын айтыпты, бірақ өндіріс орнын сату туралы ресми мәлімдеме жасалған жоқ.