Қырғызстанға заңсыз жанармай тасымалдағандар ұсталды

Қаржылық мониторинг агенттігі (ҚМА) Қазақстаннан Қырғызстанға өндірістік көлемде жанармай экспорттаған қылмыскерлерді анықтады.

Жедел-іздестіру шаралары барысында ҚМА қызметкерлері Түрксіб станциясында АИ-92 маркалы бензин тиеген сегіз теміржол цистернасын тоқтатты. «Кара Май ОйЛ» шағын мұнай өңдеу зауытынан шыққан отынның жалпы көлемі 500 тонна шамасында.

Алдын ала мәлімет бойынша 2023-2024 жылдары қылмыскерлер Қырғызстанға 102 мың тоннадан астам мұнай өнімдерін заңсыз жеткізген, бүгінге дейін қаржы айналымы 15.5 млрд теңгеден асыпты.

Елімізде бензин мен дизельді сыртқа шығаруға тыйым салынған, шектеу мерзімі аракідік ұзарып отырады. Соңғы қаулы 1 ақпанда күшіне енді және наурыздың аяғына дейін жарамды. Билік өкілдері баға реттеуден бас тартып, ЕЭО аумағында отын бағасын теңестіруге себеп болған мәселенің бірі — жанар-жағармайдың көрші елдерге есепсіз ағылуы деді.