Қазақстан жанармай импортын салықтан босатады

Қазақстан бірнеше жылдан бері Ресейден жанармай алып, ішкі нарықты отынмен қамтып келеді. Индикативті талдау бойынша Қазақстан 2025 жылы жанармайға сұраныс жоғары кезеңде 285 мың тонна бензин мен 450 мың тонна дизель импорттауға тиіс болған.

Бірақ көрші елдің жанармай нарығында мәселе туындағандықтан, Қазақстан отынды ЕАЭО-ға мүше емес елдерден алуды жоспарлап отыр. LS порталы Сауда және интеграция вице-министрі Жәнел Күшіковаға сілтеме жасап хабарлағандай, билік импортты жеңілдету мақсатында жанармай өнімдерін елге кіргізгенде салынатын кедендік алымнан бас тартады. Бұл жұмыс Еуразиялық экономикалық комиссия аясында жүріп жатыр.

Вице-министрдің айтуынша мұнда Қытайдан келетін бензин, дизель және авиаотын жайлы сөз болып отыр. Жанармайды баж салығынсыз импорттау мерзімі — бір жыл.