Қырғызстан полициясы жолда тәртіп орнатпақшы. 24.kg агенттігі хабарлағандай, ІІМ елде самокат пен скутер қатысқан жол-көлік оқиғалары күрт көбейді деп мәлімдеді. 2025 жылдың алғашқы бес айында Бішкекте 186 апат болған, бұл былтырғы көрсеткіштен екі есе көп.
Ведомство өкілдері жалға беру сервистері қауіпсіздікті қамтамасыз ете алмайтынын және көліктің техникалық жағдайын бақыламайтынын, ал қала инфрақұрылымы екі дөңгелекті құралға бейімделмегенін атап өтті.
Жүргізушілер қалай болса солай айдайды. Ереже жоқ. Ешқандай жауапкершілік қарастырылмаған, — деді министрлік.
Осыған байланысты Қырғызстанның ІІМ мынадай шаралар ұсынды:
- мопед пен электросамокат жүргізу үшін жеке категория енгізу;
- иелерін мұндай көлік құралын тіркеуге және мемлекеттік нөмір алуға міндеттеу;
- Бішкекте электросамокатты жалға беруге толық тыйым салу.
Бұған дейін қала тұрғындары тротуарда тұрған, жаяу жүргінші өткелін бөгеп тастаған самокаттарға және жүргізушілердің қауіпті маневріне шағымданған еді. Журналистер Қырғызстан астанасының әкімдігі ІІМ бастамасын қолдауы әбден мүмкін деп санайды.
Қазақстанда биыл сәуірден бастап куәліксіз және нөмірсіз мопед жүргізуге болмайды.
Электросамокатқа нөмір тағу мәселесінде еліміздегі полицейлер әзірге нақты шешімге келген жоқ.
Комментариев: 0