Алматыда бір күнде 800-ден астам самокатшы ереже бұзған

Қасым-Жомарт Тоқаев 8 қыркүйектегі жолдауында электрсамокатқа қатысты мәселеге назар аударды. Мемлекет басшысының сөзінен кейін бірден іске кіріскен полиция Алматыда рейд өткізіп, нәтижесін жариялады.

Бір күнде қалада 800-ден аса самокатшы жол ережесін бұзған. Олардың ішінде:

• жол қозғалысына қатысушыға қойылатын талапты сақтамау (Әкімшілік кодекстің 620-бабы) — 489;
• жаяу жүргінші мен өзге де жол қозғалысына қатысушының ереже бұзуы (Әкімшілік кодекстің 615-бабы) — 237;
• ата-ананың бала қауіпсіздігін қамтамасыз ету шараларын орындамауы (Әкімшілік кодекстің 127-бабы) — 11;
• абаттандыру ережесін бұзу (Әкімшілік кодекстің 505-бабы) — 47;
• қоғамдық орынды ластау (434-2-бабы) — 23.

Полицейлер тұрақта дұрыс тұрмаған самокаттар қозғалысқа кедергі болатынын немесе қолайсыздық тудыратынын атап өтті. Бір күнде 259 техника айыптұраққа аттанды.