Электросамокат қандай нөмір алады

ІІМ электросамокатты есепке қою және нөмір беру ережесін бекітті. Құжатқа сәйкес электросамокат полиция базасына кірмейді. Операторлар қос дөңгелекті көлікті жалға бермей тұрып, оған бір латын әрпі мен бес саннан тұратын нөмір тағып, есепке қояды.

Олар мынадай мәліметті тіркеуге міндетті:

• маркасы, моделі және шыққан жылы;
• сериялық нөмірі;
• пайдалануға берілген және одан шыққан күні;
• техникалық қызмет көрсету және жөндеу туралы мәлімет;
• тіркеу нөмірі.

1. 1 және 2-типтегі нөмірлердің фоны — ақ, әріптер мен сандар — қара түсті;
2. 1-типтегі нөмірдің өлшемі: ені — кемінде 136 мм, ұзындығы — кемінде 136 мм, пропорция сақталуы керек;
3. 2-типтегі нөмірдің өлшемі: ені — кемінде 45 мм, ұзындығы — кемінде 186 мм, пропорция сақталуы керек;
4. 1 және 2-типтегі нөмірлердің әрпі мен сандарының биіктігі — кемінде 30 мм.

Кикшеринг компаниялар нөмірді «00001» санынан бастап, рет-ретімен беруге тиіс. Техника қолданыстан шықса, нөмірі қалады және басқа көлік құралына тағылмайды.

Компания таңдаған латын әрпі оның барлық электросамокатында болады және оны өзгертуге немесе басқа операторға беруге рұқсат жоқ. Әріп таңдағанда жалға берушілер бір-біріне жазбаша түрде хабар беруі керек.

Хабарлама жібергеннен кейін 5 жұмыс күні ішінде басқа кәсіпкерлер қарсы болмаса, компания сол әріпті пайдаланады. Жалға берушілер арасында дау туса, оны келіссөз арқылы шешеді.

Нөмір электросамокаттың артқы бөлігінде, артқы дөңгелектің үстінде және рөлдің сол және оң жағында тұруға тиіс. Оны механикалық зақымға, ылғалға, ультракүлгін сәулеге, температура өзгерісіне төзімді, жарық шағылыстыратын төсемі бар материалдан жасау қажет, сонымен қатар бүлінбейтін және анық оқылатын болуы керек.

Нөмір бүлінген немесе жоғалған жағдайда оператор әрпін және сандарын өзгертпей қайта жасауға міндетті.

Ереже 1 шілдеден бастап күшіне енеді.