Елде велосипед тіркеу міндетті бола ма?

Бұған дейін Ішкі істер министрінің орынбасары Санжар Әділов жұмыс тобы самокатқа ғана емес, велосипедке де мемлекеттік нөмір тағатын Швейцария тәжірибесін зерттеп жатқанын айтқан.

«Бұл норма мен ұсыныс өте өзекті. Қазір белсенді жұмыс жүргізіп жатырмыз», — деген еді вице-министр.

Бірақ бүгін мәжілісте ішкі істер министрінің тағы бір орынбасары Игорь Лепеха басқаша пікір айтты.

«Велосипед туралы әңгіме жоқ (оларға мемлекеттік нөмір тағу туралы. — Kolesa.kz ескерт). Иә, балалар велосипеді туралы айтып жүргендер бар, бірақ бұл шындыққа жанаспайды. Ал самокат жайлы әңгіме мүлде бөлек. Барлық самокатта сәйкестендіру нөмірі бар, бірақ ол кішкентай, көрінбейді. Оны агрегатор-фирмалар өзі орнатады. Қазір депутаттар соны көрінетіндей етіп үлкейту туралы бастама көтердік. Мысалы, оқыс оқиға болса, нөмірді көрген адам „баланы мынадай нөмірі бар самокат қақты“ деп айтады. Сол нөмір бойынша агрегатормен бірге жол апатын жасаған самокатшыны оңай табамыз», — деді вице-министр.

Сонымен Қазақстан билігі велосипед пен самокатты тіркей ме, жоқ па? И. Лепеха компаниялар нөмір таққан жалға берілетін самокаттар туралы ғана сөз қозғады. Бірақ көшеде жеке тұлғаларға тиесілі самокат аз емес, оларда нөмір жоқ. Апат болса оларды қалай табады? Велосипедке қатысты да осындай сұрақ туындайды. Күн жылынғалы жолда мұндай техника көбейіп келеді. Оның үстіне мопедті тіркеуге тура келгендіктен, курьерлер еш құжат талап етпейтін велосипед сияқты көлік құралдарына ауысып жатыр.

Сіздің ойыңызша мұндай техниканы тіркеу қажет пе?