Қазақстандық куәлік БАӘ-де қашан жарамды болады

Қазақстан мен Біріккен Араб Әмірлігінің Ішкі істер министрлері жүргізуші куәлігін өзара қабылдау туралы меморандумға биыл 25 маусымда Абу-Дабиде қол қойды. ҚР Ішкі істер министрлігі хабарлағандай, құжат 25 шілдеде күшіне енеді.

Қазақстан полициясы меморандум екі түрлі жағдайды қамтиды деді:

1. Азамат басқа елге уақытша (турист, іскерлік немесе жеке мақсат) барғанда Қазақстан мен Біріккен Араб Әмірлігі ұлттық жүргізуші куәлігін өзара қабылдайды. Қазақстан азаматы БАӘ-де өзінің куәлігімен көлік жүргізе алады.

2. Қазақстан азаматы БАӘ-ге көшіп, ықтиярхат алса жүргізуші куәлігін емтихан тапсырмай-ақ БАӘ куәлігіне ауыстыра алады. Бұл мүмкіндік тек жеңіл көліктерге қатысты. Басқа категориядағы (автобус, жүк көлігі) куәлік қабылдаушы елдің заңнамасына сәйкес ауысады.

Жүргізуші куәлігін ауыстыру үшін не қажет

1. ықтиярхат;
2. B, B1 санатындағы ұлттық құжат және жүргізушінің жасы 18-ден асқан болуы керек;
3. жүргізуші куәлігінің ресми аудармасын тұрып жатқан елдің мемлекеттік тілінде (араб тілі) ұсыну;
4. медициналық тексерістен өту.

Ұлттық жүргізуші куәлігі өз иесінде қалады. Құзырлы органдар тек азамат құжатты ауыстырғанын бір-біріне хабарлайды.