Бұл жолы дизель жетпеуіне Атыраудағы мұнай өңдейтін зауытта 1 ақпан күні болған апат себеп болуы мүмкін. «ҚазМұнайГаз» жедел штаб құрып, зауыт директорының бірінші орынбасарын жұмыстан шығарды, ал басшыға қатаң сөгіс берген. Алайда бұл шарадан халыққа келер пайда жоқ.
Сарапшылардың айтуынша елде бензинге қатысты мәселеболмағанмен, көктемде дизель тапшы болады деген болжам бір жарым ай бұрын расталды. Істен шыққан крекингті жөндеуге кем дегенде үш апта кетеді, одан кейін зауыт күрделі жөндеуге жабылуы мүмкін. Ал наурызға жоспарланған Шымкенттегі зауытты жөндеу жұмыстары қыркүйекке қалатын сияқты.
Әзірше Атырау мұнай өңдеу зауыты ақпанда шығаруға тиіс болған 45 мың тонна дизель тапшы болады. Оның алдын алу үшін үкімет шетелден келетін дизель үшін акциз сұрамау туралы шешім қабылдайын деп жатыр. Тиісті қаулы бір-екі күнде шығып қалар. Нәтижесінде солтүстік аймақтарға Ресейден бір литрі 270 теңге тұратын солярка келеді. Бірақ ол түрлі процедурадан өтетіндіктен, көктемде ғана жетеді.
Атыраудағы кәсіпорынның уақытша жабылуы сұйытылған мұнай газы өндірісіне де әсер етті. Uralskweek.kz 6 ақпаннан бері Батыс Қазақстанда көгілдір отын тек талонмен беріліп жатқанын жазды. Шенділер мәселені екі-үш күнде шешуге уәде беріпті. Алайда батыс өңір басшыларының жоспары іске аспай, газ тапшылығы бүкіл ел аумағында сезілетін сияқты.
Биыл жоспар бойынша елдегі мұнай өңдейтін барлық зауытта күрделі жөндеу жүреді. Сондықтан темір тұлпардың азығын табу күн өткен сайын қиындай түсуі мүмкін
Комментариев: 0