Энергетика министрінің міндетін атқарушы Болат Ақшолақов кеше елде бензин мен дизель бағасы өсетінін мәлімдеді. Кешке шенділер Энергетика министрлігі дайындаған үш бұйрық жобасын талқылауға шығарды: жанармайдың шекті бөлшек бағасын өзгерту, шекті бағаны белгілеу әдістемесін бекіту және шекті көтерме бағаны белгілеу. Жобада не айтылды?
АИ-92 және АИ-93 маркалы бензиннің литрін 205 теңгеден, ал дизельді 295 теңгеден сатуды ұсынып отыр. Шенділер дизельдің бөлшек саудадағы шекті құнын «Argus Media Limited мәліметі бойынша анықталған Қырғызстан және Өзбекстандағы орташа бағамен» теңестірмек. Оның үстіне отынды бұрынғыдай жеңіл машинаға 100 литр, жүк көлігі мен автобусқа 300 литрден сатады.
Шекті баға қанша уақытта өзгеріп тұратыны құжат жобасында көрсетілмеген, бірақ елдің экономикалық қауіпсіздігіне қауіп төнсе, Энергетика министрлігі үкіметпен келісе отырып, ережелерге қарамай жанармай бекетіндегі бағаны өз бетінше өзгерте алады деп жазылыпты.
Шенділер жанармай көрші елдерге кетпес үшін бағаны көтергелі отырғанын айтады. Бұл проблема бұған дейін де талқыға түскен, көрші елге жасырын отын тасу мәселесі әсіресе Жамбыл облысында жиі байқалады. Бірақ Энергетика министрлігі шекарадағы тәртіпті күшейтудің орнына дизель тапшылығын баға өсіру арқылы шешкенді жөн көріп отыр.
Комментариев: 0